Японы мэргэжлийн сумо бөхийн 42 дэх аварга, сумогийн олон амжилтуудын эзэн М.Даваажаргал Монгол Улсын иргэншлээс татгалзах хүсэлтээ хүргүүлсэн талаар бид өмнө мэдээлж байсан билээ.

Холбоотой мэдээ

Хакухо М.Даваажаргал Монголын иргэншлээс татгалзжээ

2019-04-16

Тэгвэл энэхүү хүсэлт Монгол Улсын Ерөнхийлөгчид  өнгөрсөн долоо хоногт иржээ. Ерөнхийлөгчийн зүгээс ирүүлсэн материалыг шалгаж үзээд иргэншлээс хасах эсвэл хасахгүй байх шийдвэр гаргадаг юм байна. Монгол Улсын иргэншлээс татгалзах хүсэлт ирүүлсэн тохиолдолд маш олон хуулийн байгууллага болон холбогдох байгууллагуудаас татгалзахыг зөвшөөрөх эс зөвшөөрөх хүсэлтүүдийг нэгтгэж гаргасан учраас одоо эцсийн шийдвэрийг Ерөнхийлөгч гаргах юм. Тэгвэл Ерөнхийлөгчийн зүгээс холбогдох байгууллагаас ирүүлсэн саналуудыг нэгтгэж, судалж байгаа юм байна. Ерөнхийлөгчийн хувьд иргэншлээс хасахгүй байх шийдвэр гаргах боломжтой юм байна.

Хуулийн дагуу Монголын иргэншлээс татгалзах хүсэлтээ гадаадад байгаа бол тухай улсад байгаа Элчин сайдын яамаар дамжуулдаг бол Монголд байгаа бол НЗДТГ-аар дамжуулж, Гадаадын иргэн харьяатын газарт хүргүүлдэг юм байна. Түүний дараа Ерөнхийлөгчид хүргүүлэх юм байна. Хакухо М.Даваажаргалын хувьд иргэншлээс татгалзах хүсэлтээ Японы Элчин сайдаар дамжуулан ирүүлсэн байна.

Хакухо М.Даваажаргалын хувьд Монгол Улсын иргэншлээс татгалзах шийдвэрийнхээ хариуг хүлээж байгаа гээд “Шинэ банцүкэ дээрх Рэйва гэсэн ханзыг хараад шинэ эрин эхэллээ гэдгийг жинхэнээсээ мэдэрлээ. Хэйсэй эринд ганц зүйл дээр их харамсаж байсан. Ёкозүна Фүтабаямагийн 69 дараалан ялсан амжилтад тун ойрхон буюу 63 дараалж ялаад унасан явдал байлаа. Гэхдээ би өнгөрснөөсөө их зүйл суралцсан. Анх 15 настайдаа Японд ирж, өдийг хүртэл бүх л амьдрал минь Хэйсэй эринд өнгөрсөн. Эзэн хааныг Сүмогийн ордонд ирж тэмцээн үзэхэд ялагдаж байгаагүйдээ баярладаг. Маргаашнаас буюу угтан ирж буй Рэйва эринд та бүхэнд шинэ Хакүхог харуулах болно” хэмээн ярилцлагууддаа дурдаж байсан юм.

Ш.ЧИМЭГ