Таван жилийн хугацаанд олгогдолгүй гацчихаад байсан хайгуулын тусгай зөвшөөрлийг энэ оны эхнээс/01.26/ олгож эхэлсэн нь таг суучихаад байгаа эдийн засагт бага ч гэсэн нэмэр оруулах шийдвэр яах аргагүй мөн байсан. Гэтэл дов жалганы үзэл, газар шороогоо хамгаалж буй гэх хэсэг нөхдөөс болоод энэ ажил багагүй гацаанд ороод буй бололтой. Ашигт малтмалын газар/АМГ/-аас явуулсан цахим дугаар олголтод бүртгүүлэн солбилцол буюу орд газраа сонгон авч бүхий л бичиг баримтаа бүрдүүлсэн аж ахуй нэгжүүдэд саад болж буй ганц л зүйл байгаа гэнэ. Тэр нь аймаг, орон нутгийн Засаг даргын зөвшөөрөл юм байна.

Харин 137 өргөдөлд аймаг орон нутгийн удирдлага татгалзах хариу ирүүлж, 492 өргөдлийн хариуг огт өгөлгүй таг гацаачихаад байгаа гэдгийг АМГ-аас мэдээлж байна.

Ашигт малтмалын газарт сүүлд /04.27/ нэгтгэгдсэн дүнгээр нийт 1320 өргөдлийн дугаар олгогдсоноос 830 өргөдлийг иргэд аж ахуй нэгж гаргаж, 490 нь цагтаа амжиж өргөдлөө гаргаагүй байна. Эдгээр 830 өргөдлөөс өнөөдрийн байдлаар 136 аж ахуй нэгж, байгууллагад лиценз эзэмших зөвшөөрөл олгогджээ. Харин 137 өргөдөлд аймаг орон нутгийн удирдлага татгалзах хариу ирүүлж, 492 өргөдлийн хариуг огт өгөлгүй таг гацаачихаад байгаа гэдгийг АМГ-аас мэдээлж байна. “Бэлчээр газрыг тарамдана, айлуудын өвөлжөө, хаваржааны хашаатай газарт олборлолт явуулахгүй, орон нутгийн хамгаалалтад авна” зэрэг шалтгаанаар ийнхүү ихэнх нь татгалзаж байгаа гэдгийг АМГ-ын дарга Д.Үүрийнтуяа онцолж байсан юм.

Өөрөөр хэлбэл, зөвшөөрлийг цахимаар авахын тулд VPN төхөөрөмжийг 280 мянган төгрөгөөр авч, системд нэвтрэх эрхийг 500 мянгаас хоёр сая төгрөгөөр авсан иргэд, аж ахуй нэгжүүд орон нутгийн удирдлагуудыг “тойгдох”-оос өөр аргагүй байдалд ороод байгаа гэнэ. “Тухайн солбилцолд лиценз эзэмшиж хайгуул олборлолт хийж болно гээд АМГ-аас зөвшөөрчихсөн. Гэтэл сумын Засаг дарга нь манай иргэд та нарыг нутагтаа оруулахгүй гэсэн гээд татгалзах тохиолдол цөөнгүй байна” гэх гомдол, хүсэлтийг аж ахуй нэгжийн зүгээс АМГ-т цөөнгүй ирүүлжээ.

Хэдийгээр долоо хоног бүрийн даваа гаригт 120 байгууллага, аж ахуй нэгжид лиценз эзэмших өргөдлийн дугаарыг олгож байгаа ч энэ ажил нь эцэстээ сумын Засаг даргын ширээн дээр хав дарагдаж байгааг яаралтай шийдвэрлэхийг лиценз хүсэгчид төдийгүй АМГ-ын Кадастрын хэлтсийнхэн хүлээж сууна.

Д.ЖАРГАЛ