Насаараа цэргийн алба хаасан бэлтгэл офицеруудын тухай өгүүлэх нэгэн сонирхолтой уран сайхны киноны гол дүрд Ардын жүжигчин Г.Равдан, Г.Мягмарнаран, Гавьяат жүжигчин Ё.Цог, Д.Гүрсэд Соёлын тэргүүний ажилтан Д.Сүхбаатар нар тогложээ.

Ур чадвар, туршлага “ханхалсан” ахмад уран бүтээлчид хамтран тоглосон “Долдугаар тусгай тасаг” киноны нээлтийн тов хараахан зарлагдаагүй байгаа ч кино сонирхогчдын сонирхлыг ихээр татаад байгаа юм.

Уг дэлгэцийн бүтээлийн талаар найруулагч Д.Отгонсүрэн ярихдаа “Монгол киноны 80 жилийн түүхэнд ахмад уран бүтээлчид хамтран гол дүр бүтээсэн уран бүтээл тун цөөн байдаг юм билээ. Манай “Онч мэргэн” продакшны хувьд эдгээр туршлагатай уран бүтээлчдээ киноны туслах дүр болох аав, ээж, эмээ өвөөгийн дүрд тоглуулах бус хамтад нь гол дүрд тоглуулахыг зорьж, ахмад таван уран бүтээлчдээ санал тавьсан юм. Ахмад уран бүтээлчид маань их сайхнаар хүлээн авч, хамтран ажилласан.

Өмнө нь 1968 онд бүтээсэн Г.Жигжидсүрэн найруулагчийн “Анхны алхам”, 1993 онд бүтээсэн Н.Ганхуяг найруулагчийн “Мичидийн зургаан гялаан” монголын уран сайхны киноноос өөр ахмад уран бүтээлчид хамтран тоглосон дэлгэцийн бүтээл байдаггүй юм билээ. Сүүлийн үед кино урлагт шинэ залуу уран бүтээлчдээс гадна жүжигчин мэргэжилгүй олны танил уран бүтээлчид ихэвчлэн гол дүрд тоглох хандлагатай болсон. Тийм учраас энэ хандлагыг өөрчилөхийн тулд ахмад уран бүтээлчдэдээ санал тавьсан. Жишээлбэл, Д.Сүхбаатар гуай Г.Равдан гуай хоёр 1985 онд хийсэн Б.Балжинням найруулагчийн “Ацаг шүдний зөрүү” уран сайхны кинонд тоглосон байдаг. Тэр цагаас хойш тус тусдаа дэлгэцийн уран бүтээлд тоглож байсан. Зарим ахмад уран бүтээлчид нь 34 жилийн дараа дахин нэг бүтээлд хамтран тоглож байна. Одоогоор киноны маань нээлтийн тов хараахан гараагүй байна. Зураг авалтыг Улаанбаатар хотод болон Хөвсгөл аймагт хийсэн” тухай ярилаа.

“Долдугаар тусгай тасаг” уран сайхны киноны туслах дүрд Монгол Улсын гавьяат жүжигчин Л.Чаминчулуун, Г.Золбоот болон жүжигчин Н.Ялалт, Ш.Доржсүрэн, Б.Навчаа зэрэг уран бүтээлчид хамтран тоглосон байна.

А.СҮРЭН