Улсын Их Хурлын Тамгын газрын ажилтнуудад зориулсан манлайллын ур чадвар хөгжүүлэх хоёр өдрийн сургалт өнөөдөр /2019.04.30/ эхэллээ.

Улсын Их Хурлын Тамгын газраас Монгол Улсын төлөөллийн байгууллагыг бэхжүүлэх нь төсөлтэй хамтран зохион байгуулж байгаа энэхүү сургалтын зорилт нь төрийн албан хаагчдад сайн манлайлагч болон удирдах албан тушаалтны манлайллын арга зүй эзэмшүүлэх, байгууллагын менежмент, стратегийн манлайлал ба төлөвлөлт, төсөл төлөвлөх, урьдаас төлөвлөн шийдвэр гаргах онолын ойлголт олгох, манлайллын ёс зүй, багааар ажиллах арга эзэмшүүлэхэд чиглэж байна.

Сургалтад хамрагдсан ажилтнууд мөн АНУ-ын парламентын үйл ажиллагаа, хуулийн төслөөр нээлттэй сонсгол, хэлэлцүүлэг зохион байгуулах талаар мэдлэгээ дээшлүүлж, үйл ажиллагааны туршлагаа нэмэгдүүлэх юм.

Сургалтыг Улсын Их Хурлын Тамгын газрын Захиргаа, аж ахуйн асуудал хариуцсан нарийн бичгийн дарга П.Цэрэн нээж үг хэлээд, оролцогчдод амжилт хүслээ гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.