Тээврийн цагдаагийн алба  дөрөвдүгээр  сарын 22-26-ны өдрүүдэд  нийт 1118 дуудлага хүлээн авснаас зам тээврийн ослын шинжтэй 837 дуудлага, мэдээллийг хүлээн авч, шалгажээ. Бүртгэгдсэн осол, хэргийн улмаас нийслэлд 34 хүн, есөн нь бага насны хүүхэд бэртэж  гэмтжээ. Орон нутагт онхолдох хэлбэрээр гарсан ноцтой зам тээврийн ослын  улмаас  хоёр хүний амь нас хохирсон хэргийг  харьяа цагдаагийн байгууллагууд шалгаж байна.

Тухайлбал, даваа гаригт 15 цагийн орчим Дархан-Уул аймгийн Хонгор сумын нутаг “Цайдмын хөндий” гэх газар асфальтан замд T.Pruis маркийн автомашин онхолдож, 20 настай зорчигч М нас барж хоёр хүн гэмтжээ. Хамгийн сүүлд гэхэд өчигдөр /2019.04.25/  15.40  цагт Нийслэлийн Хан-Уулын нутаг Дунд голын гудамж 19-ийн үйлчилгээний төвийн хойд замд T.Landcruiser-100 маркийн автомашин нь T.Rumion маркийн автомашинтай мөргөлдөж, явган зорчигч 62 настай эмэгтэй Д, 39 настай эрэгтэй А нарын  хоёр хүнийг мөргөж гэмтээсэн хэргүүдийг тус тус шалгаж байна.

СОГТУУГААР ТЭЭВРИЙН ХЭРЭГСЭЛ ЖОЛООДСОН ЗӨРЧИЛ 28 ХУВИАР БУУРЧЭЭ

Энэ сарын 24-26-ны өдрүүдэд зохион байгуулагдаж байгаа гамшгаас хамгаалах иж бүрэн сургуулийн хүрээнд архи, согтууруулах ундаа худалдан борлуулах, үйлчлэхийг хориглосонтой холбоотойгоор согтуугаар тээврийн хэрэгсэл жолоодох зөрчил буурсан гэдгийг албаныхан хэлж байв. Тухайлбал, энэ долоо хоногт гарсан осол хэргийг  өмнөх  долоо хоногийн нөхцөл байдалтай харьцуулахад нийт дуудлага 3,4 хувиар, зам тээврийн ослын шинжтэй дуудлага 13 хувиар, гэмтсэн хүн 17 хувиар өссөн байх боловч нас барсан хүн 75 хувиар, согтуугаар тээврийн хэрэгсэл жолоодсон зөрчил 28 хувиар тус тус буурсан байна.

Э.БУРАМ