Испанийн хөлбөмбөгийн "Барселона" клубын супер довтлогчид болох Месси, Неймар, Суарез нар клубын түүхэн дэх хамгийн шилдэг довтолгооны гурвал болоод байна. Өмнө нь "Барса"-гийн өөр довтолгооны хослолууд нэг улиралд 100+ гоол оруулж байсан хэдий ч одоогийнхтой  харьцуулахад хангалтгүй үзүүлэлттэй байгаа.

Тэд одоогийн байдлаар энэ улирлын бүх тэмцээнд нийт 112 гоол оруулаад байгаа юм. Эдгээрийн 53-ыг багийн супер од Лионель Месси оруулсан бол Неймар 35, Суарез 24 гоолоор тус хүргэжээ. Гэхдээ уг тоо цаашид ч өсөх боломжтой.

Тэд одоогийн байдлаар Аваргуудын лигийн хагас шигшээд "Байерн Мьюнхен"-ы эсрэг тоглох нэг тоглолт үлдээд байгаа бөгөөд бүх зүйл тэдний талд байгаа. Эхний тоглолтыг талбайдаа хийж, 3-0 харьцаатай өрсөлдөгчөө буулгаж авсан тул шигшээд шалгарах магадлал тэдний хувьд өндөр. Тиймээс Аваргуудын лигийн хоёр тоглолт хийнэ гэж хэлэхэд нэг их буруудахгүй болов уу.

Мөн Ла лигийн сүүлийн хоёр тойргийн тоглолт болон Эзэн хааны цомын шигшээ тоглолт тэднийг хүлээж байгаа. Тиймээс тэдний 112 гоолын рекорд цаашид хэд хүрэх нь цаг хугацааны асуудал болоод байна.

Өмнөх их гурвалуудын нэг улирал 100+ гоол оруулж байсан үзүүлэлтийг сонирхвол, 2008-2009 оны улиралд Тьерри Анри, Самуэль Это"О, Месси нар нийт 100, 2011-2012 оны улиралд Алексис Санчес, Педро Месси нар нийт 100, 2010-2011 оны улиралд Давид Вилла, Педро, Месси нар 98 гоол оруулж байжээ.

Эх сурвалж: www.mminfo.mn