Израилийн Тель-Авивын их сургуулийн эрдэмтэд дэлхийд анх удаа 3D принтер ашиглан амьд зүрх хэвлэн гаргасан байна. Хүний эд эсээс гарган авсан энэхүү технологийг ашигласнаар ойрын ирээдүйд эрхтний хандивыг бууруулах боломжтой гэж үзжээ.

Энэхүү зүрх нь цусны судсуудаас гадна эсийн бүтцийг дэмждэг уураг, биологийн бусад молекулуудтай аж. Эрдэм шинжилгээний ажилтан, профессор Тал Двир, Tель-Авивын Амьдралын шинжлэх ухааны факультетын доктор Ассеп Шапира нар даваа гаригт дэлхийн шинжлэх ухааны түүхэнд гайхалтай ололт болсон талаар мэдээлсэн байна.

Хэвлэмэл зүрхний хэмжээ яг туулайн зүрх шиг (2.5 см орчим) аж. Нэг зүрхийг гурван цаг 30 минут орчим хугацаанд принтерээр хэвлэн гаргажээ. Эрдэмтэд хэвлэмэл зүрхийг хөгжүүлэх хэрэгтэй хэмээн хэлсэн байна. Туршилтын явцад хэдэн арван зүрх хэвлэж, үйл ажиллагааг нь шалгахын тулд амьтдад шилжүүлэн суулгажээ.

Эрдэмтэд “Энэхүү судалгаа нь өвчтөн шилжүүлэн суулгах эрхтнээ хүлээх, эсвэл бие организм нь эрхтнээ үл хүлээн авахаас урьдчилан сэргийлэх эм хэрэглэх шаардлагагүй болох замыг нээж өгнө. Өвчтөн бүрд тохирох эрхтнүүдийг ойрын 10 жилийн хугацаанд хүний эд, эсийн тусламжтайгаар гарган авах боломжтой болно" гэжээ.

Доктор Двир “Өмнө нь хүний эд эрхтэн хэвлэж байсан боловч цусны судасгүй энгийн байсан. Энэ удаа цусны судас, ховдол, таславчтай анхны амьд зүрхийг бүтээлээ" хэмээн ярьжээ.

Эх сурвалж: Haaretz, Daily Mail