-"Хайрын хүч" хандивын тоглолт энэ сарын 20-ны өдөр "UB Palace"-ын концертийн их танхимд болно-

Сүүлийн үед сошиал ертөнцөд олны хүндэтгэлийг ихэд хүлээгээд байгаа залуу бол хөтлөгч Б.Тамир билээ. Тэрээр М.Болормаатай танилцаад 2013 онд хуримаа хийсэн боловч 6 сарын дараа түүний эхнэрийн бие муудаж эхэлсэн байна. Тэд 2014 онд өвчний ерөнхий оношыг тодруулахад маш ховор тохиолддог ясны хорт хавдар гэсэн аймшигт хариуг сонсжээ. М.Болормаа химийн, туяан зэргээр маш олон эмчилгээ хийлгэсэн боловч түүний бие сайжрахгүй байгаа юм. Тэдний мэдээлэл сошиал ертөнцөд цацагдаж эхэлсэнээс хойш маш олон хүмүүст хүрч чин сэтгэлийн дэм, урам хайрласаар байгаа төдийгүй тэднээр бахархаж байгаа юм. Ийнхүү тэдний энэхүү их хайрын хүчинд тулгуурлан ангийн хамт олон, найз нөхөд нь энэ сарын 20-ны өдөр Улаанбаатар палас-д 19.00 цагаас "Хайрын хүч" тоглолтыг зохион байгуулахаар болжээ.

Мянга мянган хосууд хайрандаа хөтлөгдөж болзох энэхүү тоглолтод "Эмоци" продакшн, BX, Б.Баярцэцэг, Наагий, П.Баярцэнгэл, Бичүү, Амина, Мөнхбат&Үүрээ, "L guards", "Салхи", 3 бүдүүн, "Outlaw", "Мөнхийн реп", "Нэгэн зүгт", "Take off", "Fire", "Sync", "Motive", “Улаан туг” бүжгийн хамтлагууд оролцоно. Мөн дуучдаас С.Амармандах, Сэлэнгэ, Бобо, О.Анхаа Б.Халиун, Б.Жавхлантөгс, А.Хишигдалай, Зоригт, Gee, Цэцээ, Дандий зэрэг монголын шилдэг уран бүтээлчид оролцож хос залууст хайрын хүчээ хайрлах нь ээ.

Ингээд хайрынхаа төлөө тэмцэж яваа залуу хосоо дэмжиж мянга мянган хосуудыгаа 5 сарын 20-ны үдэш нэгэн оройг рок, попын ододтой хамт мартагдашгүй өнгөрүүлж тэдэнд хайрын хүч бэлэглэцгээе.

Ч.БОЛОР