Нийгэм айдас хүйдэстэй. Эдийн засгийн олон дуулиан, Оюутолгойн асуудал зэргээс улбаалж, олонх нь ажилгүй, орлогогүй болох вий гэсэн айдастай, цөөнх нь эрх мэдэл, албан тушаал, эд хөрөнгөө алдах вий гэсэн хүйдэстэй. Хуулийн сайд Ц.Нямдорж хүртэл айдастай. Хэт их айсан хүн юу ч хийхээс буцахгүй болж, нэг ёсондоо өөрийн ухаанаа алддаг. Чуулган, байнгын хорооны хуралдаан дээр С.Зоригийн амь насыг хөнөөсөн хэрэгтэй холбоотой үг хэлэх бүрт Ц.Нямдорж сайдаас айдас, адреналин ялгарах нь камерын өмнө мэдрэгдэх.

С.Зоригийн амь насыг хөнөөсөн хэргийг Улсын Дээд шүүхээс 2017 онд эцэслэн шийдвэрлэсэн ч уг шийдвэрийг тойрсон маргаан улс төрийн хүрээнд анхаарлын тэмдэг дагуулсаар.

УИХ-ын өнгөрсөн долоо хоногийн чуулганы хуралдаанаар С.Зоригийн хэргийг шалгах Түр хороо байгуулах асуудлыг хэлэлцэх үеэр О.Баасанхүү гишүүний тавьсан “Ц.Нямдорж, та түр хорооны ажлын хэсэгт орох уу. Орвол танд ямар нэг ашиг сонирхол  байгаа юм биш биз. Ажлын хэсэгтээ арга мэргэжлийн хувьд чиглүүлээд явчхаж болдоггүй юм уу. Түр хороо ямар үр дүнд хүрээд татан буугдах вэ. Маш олон хаалттай хэрэг бий. 1998 оноос хойш 2015 он хүртэл маш олон хэрэг болсон. Дамирангийн Энхбатын хэрэг гээд. Энэ бүх хэргийг ил болгох боломж байна уу” гэх асуултад Ц.Нямдорж сайд нэлээд бухимдангуй байгаа нь илт, тэрбээр “Би дэд хорооны ажлын хэсэгт орно. УИХ-ын удирдлага, намынхаа бүлэгт санал тавьж байгаад орно. 1937 оны арга хэлбэрийг таслан зогсоохын тулд чадах бүхнээ хийнэ. Хардана уу, сэрдэнэ үү хамаагүй” гэсэн хариулт өгсөн юм. Уг хариултаас харвал, Ц.Нямдорж сайдад С.Зоригийн амь насыг хөнөөсөн гэх хэргийг шалгах тун ноцтой шалтгаан байж мэдэхээр.

  Хууль зүй, дотоод хэргийн сайдын хувьд нэгэнтээ ил болчихсон энэ хэрэг дээр хяналт тавиад явах эрх мэдэл Ц.Нямдоржид бий. Гол нь шүүхийн шийдвэр нь гарчихсан хэрэг дээр ажиллах дэд хороог УИХ-аас байгуулж, Ц.Нямдорж заавал орно гэж зүтгээд байгаагийн ард “Танд ямар нэг ашиг сонирхол  байгаа юм биш биз” гэж О.Баасанхүү гишүүн хардах нь ч зөв.

С.Зоригийн амь насыг хөнөөсөн гэх гэмт хэрэгтнүүдийг эрүүдэн шүүсэн бичлэгийг дэлгэхдээ Хууль зүй, дотоод хэргийн сайд Ц.Нямдорж “Би тэр хоёр ялтантай очиж уулзсан. Шоронд 20-25 жилийн ялтай тэр эмэгтэйтэй ч уулзсан. Өчигдөр эмнэлэгт хэвтүүлсэн. Миний чадах юм энэ. Цаашид эмнэлэгт хэвтүүлж байгаад гаргана гэж бодож байна. Би ХЗДХ-ийн сайдын хувиар тэр гурван хүний ар гэрээс уучлалт гуйж байна. Би уучлал гуйж байгаагүй хүн шүү” гэсэн билээ. Түүний хариуд УЕП-ын орлогчоор ажиллаж байсан Г.Эрдэнэбат “Цаашид С.Зоригийн хэргийн мөрдөх ажиллагааг ямар ч зорилгогүй зогсоох ажиллагаа л явж байна гэж харж байна. Одоо ч үүндээ итгэлтэй байна. Хэн ч зөвтгөхийн аргагүй баримтыг гаргаж ирж, хөзөр болгож тавьж байгаа нь энэ хүн өнөөдөр ардын баатар мэт харагдаж байна. Энэ хэргийг мөрдөн шалгах ажиллагаа явуулахад зөндөө хариу үйлдлүүд хийсэн. Тэр нь илэрч, шалгаад эхлэнгүүт сандарч, хууль зөрчин байж, гэмт хэрэг үйлдэн байж энэ хэргийг зогсоож байна. Энэ хэргийн захиалагчийг хайсан, гүйцэтгэгчийг олсон. Захиалагчийг олчихвол саад учруулаад байгаа хүнд маш аюултай нөхцөл байдал үүсчихээр байгаа учраас гэмт хэргийн аргаар энэ үйлдлийг хийж байна. Анзаарвал, өнөөдрийг хүртэл энэ хэрэг илрэхгүй байгаад захиалагчийн үүрэг оролцоо ямар түвшинд байгаа нь харагдана” гэх ярилцлага хэвлэлд өгсөн юм.

Энэ бүх үйл явдлаас дүгнэхэд Ц.Нямдорж сайд С.Зоригийн амь насыг хөнөөсөн гэх хэргийг үнэн зөвөөр нь тогтоох сонирхолгүй юм шиг, түүний орж ажилласан УИХ-ын түр хорооны дүгнэлт яаж гарах нь ч тодорхой. Тэгээд ч УИХ-ын түр хорооны дүгнэлт эцсийн шийдвэр болж чадахгүй. Хэрэв болно гэвэл “Шүүхийн шийдвэр эцсийнх байна” гэдэл худлаа, шүүхийн шийдвэрийг УИХ дээр давж заалдаж болно гэсэн үг үү.

Түр хороо зөвхөн С.Зоригийн хэрэг дээр ажиллах юм уу, эсвэл эрүүдэн шүүсэн гэх бүх хэргийг шүүж үзэх үү. УИХ-ын түр хорооны шийдвэрээр Т.Чимгээ, Б.Содномдаржаа нар суллагдах юм уу, эсвэл шорондоо үлдэх үү.  Баримт нотолгооны дагуу шүүсэн шүүхийн шийдвэр хүчинтэй юу, баахан улстөрчийн орж ажилласан түр хорооны шийдвэрийг дагах уу гэх зэрэг эргэлзээтэй ойлгомжгүй  олон асуулт  айдастай байгаагаа Ц.Нямдоржид тавигдаж байна. Ямартай ч гишүүд түр хороо байгуулахыг дэмжиж буй. Тэрхүү түр хорооны шийдвэр гарсны дараа С.Зоригийн амь насыг хөнөөсөн хэргийг эхнээс шалгах юм уу эсвэл эцэслэх юм уу?

Товчхондоо, С.Зоригийн  хэрэг Д.Сүхбаатарын золгүй хувь тавиланг давтаж буй мэт. Энэ хоёр хүн МАН-д ямар өртэй гэж үхсэн хойно нь ч ясыг амраадаггүй юм бэ?