Уран зураг бол энэ дэлхий дээрх хамгийн өндөр үнэтэй зүйлсийн нэг. Зүгээр ч өндөр үнэтэй биш бүр итгэмээргүй өндөр үнэд хүрсэн байдаг. Магадгүй тэдгээр бүтээлүүдийн дахин давтагдашгүй цор ганц байдал, зураачийн нөр их хөдөлмөр, зурагны цаана илэрхийлсэн тайлагдашгүй нууцууд ингэж их үнэ цэнэтэй оршин тогтнох үндэс нь болдог байх. Ингээд дэлхийн хамгийн үнэтэй уран зургийг худалдаж авах мөнгөөр өөр юу авч болохыг сонирхоцгооё.

Эдуард Манегийн “Jeanne” буюу “Хавар” бүтээл 69 сая ам.долларын үнэ хүрчээ. 1881 онд зурсан уг зургийг авах эсвэл дэлхийн хамгийн өндөр үнээр зарагдсан 1963 оны “Ferrari 250 GTO” хөлгийг авах эсэх нь таны сонголт.

Вангогийн “Vase with Fifteen Sunflowers” бүтээл нь 88 сая ам.доллараар үнэлэгджээ. Энэ мөнгөөр 2017 онд Хонг Конгийн дуудлага худалдаагаар 71 сая ам.долларын үнэ хүрсэн 59 каратын ягаан алмазан бөгжийг худалдан авч болох нь.

Клад Монегийн “Le Bassin aux Nymphéas” буюу “Сараана цэцэгт цөөрөм” зураг нь 94 сая ам.долларын үнэтэй. Та цус сорогчийн домогт дуртай бол тэртээ 1388 онд баригдсан Браны цамхгийг /Дракулагийн цамхаг/ дээрх мөнгөөр худалдан авч болно.

Поль Сезаннийн 1904 онд бүтээсэн “La Montagne Sainte-Victoire vue du bosquet du Château Noir” бүтээл 108 сая ам.доллараар үнэлэгджээ. Энэ мөнгөөр АНУ-ын Ерөнхийлөгч Дональд Трампын хөлөглөдөг “Boeing 757” онгоцыг худалдан авч болно. Энэхүү онгоц нь гайхалтай дотоод заслын ихэнхийг нь 24 каратын алтаар бүрж хийсэн байна.

Эдвард Мунк “Хашгираан” зургийг мэдэхгүй хүн ховор байх. Энэ зургийн үнэ 130 сая ам.доллар. Үүгээр та орчин үеийн техник технологиор тоноглогдсон “PJ World Explore” далайн гүний хайгуулын хөлгийг худалдан авах боломжтой.

Рембрандтын “Pendant portraits of Maerten Soolmans and Oopjen Coppit” зураг нь 190 сая ам.доллараар үнэлэгддэг бөгөөд энэ мөнгөөр Грекийн үзэсгэлэнт Скорпиос арлыг худалдан авч чадна.

Поль Гагений “Nafea Faa Ipoipo” буюу “Хэзээ гэрлэх гэж байна даа” гэдэг зураг нь 1892 онд зурагдаж дууссан. Хэрэв та хөлбөмбөгийн үнэнч фанат бол 223 сая ам.долларын үнэтэй уг бүтээлийн үнээр дэлхийн шилдэг тоглогчдын нэг Нэймарыг худалдан авах боломжтой.

Поль Сезаннийн “The Card Players” зураг нь 280 сая а.долларын үнэтэй. Үүгээр Хавайн арлын нийт үнийн 35 хувьтай тэнцэх Молокай эдлэнг худалдан авч болно. Хавайн арал дээр орших Молокай эдлэн газрыг худалдан авснаар та тус арлын таван гол эздийн нэг болно гэсэн үг.

Алдарт Леонардо Да Винчигийн “Salvator Mundi” тосон зураг. 463 сая ам.доллараар үнэлэгдэх уг бүтээлийг худалдаж авах мөнгөөр та Монако дахь дэлхийн хамгийн үнэтэй хувийн харшийг худалдан авч болно.

Леонардо Да Винчигийн хамгийн алдартай бүтээл “Мона Лиза” бол одоогоор энэ дэлхий дээрх хамгийн өндөр үнэтэй уран зураг. Энэхүү зураг нь 2018 оны байдлаар 830 сая ам.доллараар үнэлэгдсэн байдаг. Энэ мөнгөөр АНУ-ын Сиатл хот дахь “New Arena” цогцолборыг тэр чигээр нь худалдан авч хүрнэ.