Фото: Osama Faisal / AP

Хөлбөмбөгийн 2018 ба 2022 онуудын аваргын тэмцээнийг зохион байгуулах орнуудыг сонгохдоо хахууль авсан хэргийг FIFA-гийн мэдээлэгч Федра аль-Мажид илчилж, авилга авсан хүмүүсийн нэрийг илчилсэн тухай The Rheinische Post сонин мэдээлжээ.

Катарын хороонд ажиллаж байсан аль-Мажидийн хэлснээр,  Дэлхийн  Хөлбөмбөгийн Холбооны дэд ерөнхийлөгч, Камеруны Исса Аяту, FIFA-гийн Гүйцэтгэх хорооны гишүүд асан  Кот-д'Ивуарийн Жак Анума, Нигерийн Амос Адаму нарын Африкийг төлөөлсөн гурван хүн авлига авсан ажээ. Эхлээд тэдэнд нэг нэг сая ам.доллар олгоно гэж байсан нь ч тус бүр 1,5 сая доллар авч байж Катарт ДАШТ явуулахын төлөө саналаа өгчээ. Анголын нийслэл Луанда хотноо 2010 онд тэдэнд хахуулийн мөнгийг өгсөн гэнэ.

Аль-Мажид нэрээ нууцлан FIFA-тай хамтран ажиллахаар тохиролцсон байсан ч тус байгууллага түүний нэрийг 2014 онд ил гаргажээ. Мэдээлэгчийн  мэдүүлэг байгаа ч гэсэн FIFA тэмцээний эзэн орнуудыг сонгох үйл ажиллагаанд ямар нэгэн зөрчил гараагүй гэсэн байлаа. Энэ хэргээр 75 хүнээс мэдүүлэг авч 200 мянган хуудас материал цугларсан байгаа ажээ.

Бэлтгэсэн Ш.МЯГМАР