Банк бус санхүүгийн үйл ажиллагааны хууль, түүнд заасан шаардлага, шалгуурын хэрэгжилтийг тооцох зорилгоор Санхүүгийн зохицуулах хороо зохистой харьцааны шалгуур үзүүлэлтийг тогтоон тус зах зээлд мөрдүүлж, хяналт тавьж ажилладаг. Хуульд заасны дагуу ББСБ-ууд зээл, факторинг, төлбөр тооцоо, мөнгөн гуйвуулга, гадаад валютын арилжаа зэрэг 10 төрлийн үйл ажиллагааг хорооноос олгосон тусгай зөвшөөрлийн үндсэн дээр эрхэлдэг бөгөөд эрхэлж буй үйл ажиллагаа тус бүрт тавигдах зохистой харьцааны шалгуур үзүүлэлт харилцан адилгүй байдаг. Тухайлбал, төлбөр түргэн гүйцэтгэх чадварын, өрийн бичгийн болон цэвэршүүлсэн үндсэн хөрөнгийн зохистой харьцааны шалгуур үзүүлэлтийг ББСБ-ууд нийтээрээ хангах ёстой байдаг бол нэгдүгээр зэрэглэлийн өөрийн хөрөнгийг эрсдэлээр жигнэсэн нийт активт харьцуулсан харьцааг цахим төлбөр тооцоо, мөнгөн гуйвуулгын болон гадаад валютын арилжаа эрхлэх ББСБ-ууд 30-аас доошгүй хувиар, зээлийн болон факторингийн үйлчигээ эрхлэх ББСБ-ууд 20-оос доошгүй хувиар хангасан байхыг шаарддаг.

ББСБ-ууд зохистой харьцааны нийтдээ 18 шалгуур үзүүлэлтийг хангаж ажилладаг бөгөөд 2018 оны жилийн эцсийн байдлаар нийт 539 ББСБ үйл ажиллагаа явуулж буйн 88.5 хувь буюу 477 нь үзүүлэлтүүдийг бүрэн хангаж байна.

Үлдэх 11.5 хувь буюу 62 ББСБ-ын зохистой харьцаа алдагдсаны дотор тав ба түүнээс дээш зохистой харьцаа алдагдсан хоёр ББСБ байна. Мөн хоёр зохистой харьцааг хангаагүй 14, нэг зохистой харьцааг хангаагүй 46 ББСБ байна. Эдгээрийн дотор үндсэн хөрөнгийн зохистой харьцааг 20, төлбөр түргэн гүйцэтгэх чадварын харьцаа 14, гадаад актив, пассивын зөрүү өөрийн хөрөнгийн зохистой харьцааг 13, өөрийн хөрөнгө, эрсдэлээр жигнэсэн нийт активын харьцааг 12, нэгдүгээр зэрэглэлийн өөрийн хөрөнгө, эрсдэлээр жигнэсэн нийт активын харьцааг 8 ББСБ тус тус хангаагүй буюу эдгээр таван зохистой харьцааны шалгуур үзүүлэлт хамгийн их алдагдсан байна.

Эх сурвалж: САНХҮҮГИЙН ЗОХИЦУУЛАХ ХОРОО