Улс орон даяар 900 сая сонгогчтой Бүгд Найрамдах Энэтхэг улсын /БНЭУ/ парламентын сонгууль өнөөдөр /2019.04.11/ орон нутгийн цагаар 07.00 цагт албан ёсоор эхэллээ. Тавдугаар сарын 23-ны өдөр 29 муж, долоон бүс нутгийн саналыг нэгтгэж тоолсны дараа эцсийн дүн гарна гэж тус улсын Сонгуулийн хороо мэдээлжээ. Уг сонгуулиар энэтхэгчүүд одоогийн Ерөнхий сайд Нарендра Модиг албан тушаалд нь үлдээх эсэхийг шийдэх юм. Ерөнхий сайд Нарендра Модигийн үндсэрхэг үзэлт “Бхаратия Жаната” нам 2014 онд парламентын доод танхимд нийт 282 суудал аван ялалт байгуулж, 30 жилийн хугацаанд тасралтгүй Энэтхэгийн парламентын олонхын байр сууриа хадгалсаар ирсэн юм.

Энэтхэгийн парламентын доод танхимын 543 суудлын төлөөх сонгуулийн санал хураалт долоон үе шаттай явагдах ба тавдугаар сарын 19 хүртэл үргэлжилнэ. Доод тал нь 272 суудал авсан нам эвсэл сонгуульд ялалт байгуулах юм байна. Хамгийн сүүлд болсон 2014 оны сонгуульд нийт сонгогчдын 66 хувь оролцож байжээ. Энэ удаагийн сонгуульд ойролцоогоор нэг сая орчим санал хураах байр ажиллаж байна.

Энэ сонгуулийн хамгийн гол нэр дэвшигч бол яах аргагүй ерөнхий сайд Нарендра Моди. Хэдий түүнийг эх оронч удирдагч гэгддэг ч түүний удирдлага дор дэлхийн зургаа дахь том эдийн засагтай Энэтхэг улсын эдийн засгийн өсөлт саарсаар байгаа юм. Мөн Энэтхэгийн ард түмэн шашинд хэт автан туйлшрах хандлагатай болсон байна.

Энэтхэг улсад тулгамдаж буй гол асуудал бол ядуурал, ажилгүйдэл. Дээрх асуудлууд бүх цаг үед тус улсын тулгамдсан асуудал байсаар ирсэн ч яг энэ цаг үед оргил цэгтээ хүрээд байгаа аж. Тиймээс ихэнх нэр дэвшигчдийн мөрийн хөтөлбөр ядуурлыг бууруулах, ажилгүйдлийг багасгахад чиглэгдэж байна.

Эх сурвалж:BBC