Буддын шашны тэргүүн Дээрхийн гэгээн XIV Далай лам Энэтхэгт эмнэлэгт хүргэгдсэн тухай түүний туслах Мягмар гаригт /2019.04.09/ мэдээлжээ.

Өдгөө 83 настай Далай лам уушгины үрэвсэл буюу цээжний хатгалгааны улмаас Энэтхэгийн Дарамсала хотын эмнэлэгт хэвтэн эмчлүүлж байгаа юм байна. Тэрбээр 2-3 хоног эмчлүүлэх шаардлагатай байгаа гэв.

Далай лам Түвдийн бослогын 60 жилийн ойг тохиолдуулан өнгөрсөн сард "Ройтерс" агентлагт ярилцлага өгсөн юм. Энэ үеэр тэрбээр өөрийнхөө хойд дүрийг Энэтхэгээс тодрох тухай цухас дурдсан байна.

Ярилцлагын үеэр өдгөө 83 настай Далай лам “Хятад улсын хувьд дараачийн Далай ламыг тодруулах асуудал маш чухал зүйл. Тэд энэ хэрэгт надаас ч илүү санаа зовж суугаа. Намайг нас барсны дараа та бүхэн хоёр Далай лам харах болно. Нэг нь эрх чөлөөт Энэтхэг оронд тодорно. Харин нөгөө нь Хятад улсын тодруулсан хэн ч хүндэлдэггүй, хэн ч шүтдэггүй хоёр дахь Далай лам. Ингээд Хятад улсад дахин нэг санаа зовних асуудал нэмэгдэнэ. Ийм зүйл л болох болно” хэмээн хэлсэн.

Харин маргааш өдөр нь Хятадын талаас түүний хойд дүрийг тодруулах ажил БНХАУ-ын хууль дүрмийн дагуу явагдах ёстой гэсэн хариу мэдэгдэл хийсэн.

Эх сурвалж: BBC