Монгол Улсад 14 арилжааны банк үйл ажиллагаа явуулж байсан бөгөөд Төв банкнаас "Капитал" банкийг татан буулгаж, эрх шилжүүлэн авсан. Тус банкны эрх шилжүүлэг Төв банкны зүгээс эхний ээлжит хадгаламж эзэмшигч болон төрийн сангийн мөнгөнүүдийг гаргаж өгөх асуудлыг судалж байгаа гэсэн мэдээллийг албаныхан өгч буй. Тиймээс "Капитал" банкны хөрөнгө хураах, худалдах, борлуулах замаар эхний ээлжинд шаардлагатай хөрөнгүүдийг гаргаж өгөх юм. Түүнээс гадна Нийгмийн даатгалын сангийн 101 тэрбум, хөдөлмөр эрхлэлтийг дэмжих сангийн 1,2 тэрбум зэрэг төрийн сангуудын 400 орчим тэрбум төгрөг тус банкинд байршиж байсан гэдгийг салбарын сайд нь хэлж буй. Харин энэ бүх үйл явцын талаар УИХ-ын гишүүн Б.Ундармаа байр сууриа илэрхийлэхдээ өөрийгөө тус банкинд хувьцаа эзэмшдэггүй, улс төрийн явуулгатай банкийг дампууруулсан гэсэн мэдээллийг өгсөн юм. Тэгвэл энэ удаагийн VS буландаа "Капитал" банкинд УИХ-ын гишүүн Б.Ундармаа хувь эзэмшдэг эсэх талаарх эсрэг тэсрэг байр суурийг хүргэж байна. Ингэхдээ бид түүний 2016 оноос хойш АТГ-т гаргасан өгсөн Хөрөнгө орлогын мэдүүлгийг ашигласан болно.