Малаар баян  ч мах нь тансаг хэрэглээ болсон өнөө үед иргэдийн хэрэглээ улам хумигдах нь. Өнгөрсөн амралтын өдрүүдээр нефть импортлогчид шатахууны үнийг литр тутамд 45-50 төгрөгөөр нэмж, АИ 92 автобензин 1785-1790 төгрөг болжээ. Энэ чимээнээр хүнс, бараа бүтээгдэхүүн, микро автобус, таксины үнэ "тэнгэрт хаддаг".

Шатахууны үнийг ямар шалтгаантай нэмсэн талаар тодруулахаар бид энэ удаагийн сурвалжлагаа шатахуун түгээх станцуудаас бэлтгэлээ.

    ШАТАХУУНЫ ҮНЭ 50 ТӨГРӨГӨӨР НЭМЭГДЭВ

Чингэлтэй дүүргийн нутаг, Баянбүрд Тасганы овоо чиглэлд зам дагуу “Тес Петролиум” , “М-Ойл”, “Петровис”, “Синчи-Ойл”, “Сод Монгол” зэрэг шатахуун түгээх станцууд байрладаг. Эдгээр шатахуун импортлогч компаниас “Тэс Петролиум, “Петровис” компанийн шатахуун түгээх станц бүтээгдэхүүний үнээ нэмж АИ 92 автобензиныг 1 литр тутмыг нь 1790 төгрөгөөр борлуулж байв.  Харин "Сод Монгол", “М-Ойл”, “Синчи-Ойл” ШТС АИ 92-ыг 1690-1695 төгрөгөөр борлуулж байв. Гэхдээ бусад шатахуун түгээх станцуудын адил үнээ нэмж магадгүй аж.

“Синчи Ойл” ШТС-ын эрхлэгч н.Нармөнх  “Манай эндхийн зарим шатахуун түгээх станцуудад шатахууны үнэ нэмэгдээгүй байна. Хэрэв тэдгээр компани шатахууны үнээ өсгөвөл дагаад нэмнэ. Манай шатахуун түгээх станц ямар ч тохиолдолд хамгийн сүүлд шатахууны үнээ нэмдэг ч хамгийн бага үнийг барихыг эрмэлздэг. Ойрын шатахуун түгээх компаниуд үнээ нэмсэн байгааг харж байгаа байх” гэлээ.

Үнээ нэмсэн шатахуун түгээх станцууд шатахууны үнийн нэмэгдлийн шалтгааны талаар тайлбар өгөхөөс татгалзсан. Гэхдээ зарим ажилчид нь ам.долларын ханшийн өсөлт нефтийн үнэд нөлөөлсөн байх талтай гэлээ.

ШАТАХУУНЫ ҮНИЙН ӨСӨЛТ БУУРАЛТ ЯМАР Ч ӨӨРЧЛӨЛТ АВЧРАХГҮЙ

Нэрээ нууцлахыг хүссэн шатахууны түгээгч “Шатахууны үнийн бууралт ард түмэнд ямар ч эерэг өөрчлөлтийг авчрахгүй. Үүнтэй адилхан шатахууны үнийг нэмсэн ч сөрөг өөрчлөлт гарахгүй. Шатахууны үнийг 100 төгрөгөөр бууруулахад мах, ногоо, өргөн хэрэглээний бараа бүтээгдэхүүний үнэ буураагүй, эсрэгээрээ өсч л байсан шүү дээ. Одоо махны үнэ нэг кг нь 10  мянган төгрөг байгааг та нар мэднэ. Орой үдэш микро автобус 2000 төгрөгөөр зорчуулдаг. Тиймээс шатахууны үнийг нэмлээ гээд ямар ч өөрчлөлт гарахгүй” гэсэн юм.

Өнгөрсөн онд нийт таван удаагийн нэмэгдлийн дараа шатахууны үнийг литр тутамд нь 100 төгрөгөөр бууруулсан ч нүдэнд харагдаж, хэтэвчинд нөлөөлөхүйц өөрчлөлт болж чадаагүй. Уг нь цаашид ч шатахууны үнэ буурах боломжтой  гэж Засгийн газрын Хэрэг эрхлэх газрын дарга болон салбарын сайд нь хэлсэн ч эсрэгээрээ үйлчилж, шинэ он гарсаар шатахууны үнэ ийнхүү нэмэгдлээ.

Тэр тусмаа жолоо мушгиж буй хүн бүрт энэ нь хамгийн “эмзэг” асуудал юм. Шатахуун түгээх станцаар үйлчлүүлж буй иргэн Л.Амарсанаа “Шатахууны үнэ нэмэгдсэн байна билээ. Ямар шалтгаантай нэмснийг нь мэдэхгүй ч уг нь бууруулах л хэрэгтэй. Оны өмнө 100 төгрөгөөр бууруулах шийдвэр гаргахдаа дахин 200 төгрөгөөр шатахууны үнийг хямдруулна гэж сонссон. Гэтэл өнөөдөр эсрэгээрээ шатахууны үнэ нэмэгдчихлээ. Цаашид нэмэгдэл үнээ буулгах байх гэж бодож байна” .

Иргэн н.Жаргалсайхан “Миний ажигласнаар шатахуун түгээх станцууд бүгд л үнээ нэмчхэж. Ойролцоогоор 50-80 төгрөгөөр шатахууны үнэ өссөн байх шиг байна билээ. Зарим газар нь үнэ нэмэгдсэн гээд шатахуунгүй байсан. Хэрэв ямар нэгэн үндэслэлгүйгээр үнээ хөөрөгдүүлж нэмсэн бол буулгах хэрэгтэй. Мэдээж шатахууны үнэ өссөн юм чинь дагаад бүх бараа бүтээгдэхүүний үнэд өөрчлөлт орох биз” .

Иргэн Д.Энхжин “Шатахууны үнэ 50 төгрөгөөр нэмэгдэхэд л хувийн санхүүд нөлөөлнө. Авдаг шатахууны хэмжээ ч багасах байлгүй дээ. Өнөө өглөөнөөс л шатахуун түгээх станцууд үнээ нэмснийг харж байна. Гэхдээ зарим газарт хямд байна гэсэн” хэмээв.

Шатахууны үнийн нэмэгдэл өчигдрөөс л жолооч нарт мэдэгдэж эхэлжээ. Тэдний зүгээс шатахууны үнийг шалтгаангүйгээр нэмсэн тохиолдолд бууруулах шаардлагатай гэж үзэж байв.

Улсын хэмжээнд бүртгэлтэй 940.327 тээврийн хэрэгсэл байдгаас 847.414 нь автомашин байна. Нийт автомашины 496.720  буюу 59 хувь нь Улаанбаатар хотод бүртгэлтэй. Энэ бол 2018 оны статистик мэдээлэл. Үүнээс харвал автомашины хэрэглээг дагаж шатахууны үнийн хэлбэлзэл хүн бүрт хамаатайг гэрчилнэ.

Шатахуун импортлогч компаниуд үнээ нэмэх болсон шалтгаан нь  ОХУ-д энэ онд хэрэгжиж эхэлсэн хуультай холбоотой байж магадгүй бололтой. Тус улсад нэгдүгээр сарын 1-нээс мөрдөгдөж эхэлсэн шинэ хуулиар АИ 92-ын шатахууны үнэ тонн тутамдаа 117 ам.доллараар нэмэгдсэн байна.

Одоогоор шатахууны үнийн нэмэгдэлд Уул уурхай, хүнд үйлдвэрийн яам байр суурь илэрхийлээгүй байна. Гэхдээ энэ удаагийн нэмэгдэл 50 төгрөгөөр тогтохгүй, цаашид дахин 100 төгрөгөөр нэмэгдэж магадгүй нь.

Монголбанкнаас өнгөрсөн долоо хоногийн баасан гаригт инфляцын богино хугацааны төсөөллийн таамаглалыг танилцуулах үеэрээ энэ онд шатахууны үнэ харьцангуй тогтвортой байх төлөвтэйг дурдсан ч биелэсэнгүй.