Монголын хөлбөмбөгийн хамгийн нэр хүндтэй тэмцээнүүдийн аварга багууд “Супер цом”-ын төлөө өрсөлдлөө. Энэ тоглолтод “Мазала” дээд лигийн аварга “Эрчим”, “МХБХ-ны цом”-ын эзэн “Атлетик 220” багууд өрсөлдөж, ялагчаа тодруулсан. Өчигдөр хөлбөмбөгийн талбайд болсон тоглолтод “Эрчим” клуб 4:2-оор өрсөлдөгчөө хожиж, “Супер цом”-ын эзэн боллоо.

Тоглолтын нэгдүгээр үеийн 17 дахь минутад “Эрчим” клубын япон тоглогч В.Хаяато эхний гоолыг оруулсан бол “Атлетик 220” багаас Н.Наранболд хариу гоол оруулж, тоог тэнцүүлсэн. Удалгүй легионер В.Хаяато 59 дэх минутад хоёр дахь гоол хийж, улмаар К.Мотохиро 70, 77 дахь минутад гоол оруулснаар “Эрчим” 4:1-оор тэргүүллээ бататгав. “Атлетик 220” багийн Б.Өлзий-Од 90+1 минутад гоол хийсэн ч тоог ойртуулж чадсангүй.

Ийнхүү “Эрчим” клуб Монголын хөлбөмбөгийн холбооны “Супер цом”-ыг найм дахь удаагаа өргөж, талбайн улирлыг хожлоор эхлүүлэв.

“Атлетик 220” багаас Н.Наранболд тоог 1:1 болгож тэнцүүлэв.