“Гурван найз: Яасан байх нь уу?” уран сайхны киноны уран бүтээлчид өнгөрөгч амралтын өдрөөр Хүннү Молл цогцолборт киноны нээлттэй өдөрлөгийг зохион байгуулж үзэгч олонтойгоо нэгэн өдрийг хамтдаа өнгөрүүллээ. Нээлттэй өдөрлөг хамтлаг дуучдын тоглолт, уран бүтээлчдийн уулзалт, тусгайлан зассан киноны тайзан дээр “Гурван найз” киноны дүрийг хэрхэн бүтээх вэ? мөн Автомат тоглоомын тэмцээн уралдаанууд зохион байгуулагдаж залуучууд өргөнөөр оролцсон юм.

Энэ үеэр “Гурван найз” цуврал 40 ангит киноны зураг авалтын павилоныг яг тэр чигээр нь “Хүннү молл” цогцолборт босгож киноны үзэгчид, өөрсдийн үзэх дуртай киноны хэсгээс дүр бүтээж, тоглосон хэсгийг тэр дор нь DVD дээр буулган дурсгал болгон өгч байлаа. Киноны бүхий л зүйлсийг нэг дор байлгаж найруулагч Сувидын Баттулгын удирдлаганд дүр бүтээсэн залуучууд сэтгэл хангалуун гарч байсан нь “Гурван найз:Яасан байх нь уу?” киноны нээлттэй өдөрлөгийн онцлох нэгэн арга хэмжээ байлаа.

“Гурван найз: Яасан байх нь уу?” инээдмийн киноны дуу болох “Үүрд хамт” дууг Бид-4 хамтлагийн дуучин Б.Замбалгарав төгөлдөр хууртай хослон дуулсан юм. Тухайн өдөрлөгийг үзэхээр ирсэн үзэгчдийн хувьд “Гурван найз:Яасан байх нь уу?” уран бүтээлийн бас нэгэн дууны хамгийн анхны сонсогчид болж Люмино хамтлагийн залуусыг угтаж авсан нь “Яасан байх нь уу?” нэртэй дуу байлаа. 

“Гурван найз:Яасан байх нь уу?” киноны өдөрлөгийн гол хэсэг бол жүжигчдийн уулзалт байлаа. Киноны туслах дүрийн жүжигчин МУСТА жүжигчин Б.Баатархүү, МУСТА жүжигчин Г.Нарансолонго, жүжигчин Б.Ариунцэцэг, Г.Эзэнмөнх жүжигчин Т.Энэрэл залуу жүжигчин Т.Номин нар ирж үзэгчидтэй уулзаж хамтдаа зургаа татуулсан юм. Гол дүрийн жүжигчид болох МУСТА жүжигчин О.Тэмүүжин, МУСТА Эмоци продакшны захирал Д.Түвшинтөр, Жүжигчин Г.Анхбаяр нар үзэгчидтэйгээ нээлттэй уулзалт хийж, киноны постер дээр гарын үсгээ зуран дурсгаж, хамтдаа зургаа авахуулсан юм. Мөн тусгайлан зассан киноны павилонд өөрсдийн биеэр шууд киноны хэсгээс тоглосон нь үзэгчдэд ихэд таалагдсан байна.

Нээлттэй арга хэмжээний үеэр зохион байгуулагдсан тэмцээн уралдаанд амжилттай оролцсон үзэгчдийг киноны тасалбар, постероор шагнаж урамшуулжээ. Бүтэн өдрийн турш үргэлжилсэн “Гурван найз:Яасан байх нь уу?” киноны нээлттэй өдөрлөг ийнхүү амжилттай өндөрлөлөө.