-Сагсан бөмбөгийн Дээд лигт 2003, 2006, 2007, 2011 онуудад Аварга цол хүртээд байсан "Дундговь Альянс Тех харцага" 2015 онд 5 дах удаагаа Үндэсний аварга цолыг хүртлээ-

Үндэсний супер лигийн шийдвэрлэх тоглолтууд Хандгайтад нээгдэж буй Д.Содномзундуйн нэрэмжит сагсан бөмбөгийн шинэ ордонд тавдугаар сарын 2-ны өдөр боллоо.

ХҮРЭЛ МЕДАЛЬ: "Хасын Хүлэгүүд"-"Эрдэнэдрийлинг" 89:88

АЛТАН МЕДАЛЬ: "Дундговь Альянс Тех Харцага" – "Дорнод Танан Гарьд" 98:87 (Цуврал 4:2)

SBL ХАСЫН ХҮЛЭГҮҮД ХҮРЭЛ МЕДАЛИЙН ЭЗЭД БОЛЛОО

Үндэсний Супер Лигийн Хүрэл медалийн төлөө "Увс Эрдэнэдрийлинг Ригс" болон "SBL Хасын Хүлэгүүд" багууд тоглохоор болоод байсан билээ. Тус 2 багийн тоглолт Хандгайт дахь Д.Содномзундуй агсны нэрэмжит Үндэсний сагсан бөмбөгийн ордонд болсон эхний тоглолт байсан юм.

Тоглолтын 1-р үед багууд тун тэнцүүхэн тоглолт үзүүлсэн юм. Хүлэгүүдээс энэ өдөр Phil Jones тус тоглолтын цор ганц легионер байсан юм. Хоёр баг бусад легионер тоглогчдоо нутаг буцаасан байлаа. Будагтай талбайд тоглолтын эхнээс С.Өрнүүнбилэг сайн тоглолт үзүүлж, хэрэгтэй оноог авч байсан бол Phil Jones ч өөрийн давуу талаа ашиглаж чадаж байсан юм. Улмаар эхний үед хоёр баг ойролцоо оноог авсан. Гэсэн ч энэ үеэс Ригсийн довтолгоо ширүүсч эхэлсэн гэхэд болно. Н.Золжаргал, М.Бадрах нарын шидэлтүүд ч оноо болсоор байлаа. Гэсэн ч Хүлэгүүд хариуг нь барьсаар эхний хагас 38:38 харьцаатай өндөрлөсөн. Харин 3-р үе тэр чигтээ Ригсийн үе байсан гэхэд болно. Ялангуяа 3-р үеийн сүүлийн 4 минутанд Ригсийн шидэлт болгон оноо болсоор тэд 17 оноог илүү авч чадсан юм. 4-р үед ч тэд эхлэлийг сайн тавьж, тооны зөрүүг 20 болгож чадсан. Гэхдээ тоглолтын хувь заяа Ригсийн талд шийдэгдэх болоогүй байгааг Хүлэгүүд харуулж чадав. Урагшаа шахсан, прессинг хамгаалалтыг хийж, олон удаа бөмбөг тасалж чадсанаар тооны зөрүүг 2 болгон ойртуулж чадсан. Ригс прессингээс гарч чадалгүй бөмбөгөө хэтэрхий олон алдсан юм. Улмаар Н.Золжаргал ч алдааны асуудалд орж, 6 алдаатай болсноор тоглолтыг орхисон. 4-р үеийн төгсгөлийг Б.Билгүүн гайхалтай хийж, довтолгоонуудаа оноо болгож байснаар эцсийн мөчид чухал 2 оноог авч, 89:88 харьцаатай "SBL Хасын Хүлэгүүд" баг итгэмээргүй эргэн ирэлт хийж, Үндэсний Супер лигийн хүрэл медалийн эзэд болсон юм. Тэд ингэснээр Супер лигт алт, мөнгө, хүрэл медаль хүртсэн анхны баг боллоо.

Тус тоглолтонд Б.Билгүүн багаа тэргүүлэн 29 оноо, 12 самбар авсан бол А.Бямбадорж 21 оноо, О.Сэргэлэн 12, Phil Jones 10 оноо, 13 самбар, М.Отгонмөнх 10 оноог тус тус авчээ. Харин Ригсээс С.Өрнүүнбилэг 35 оноо, 20 самбар авч гайхалтай тоглолт үзүүлсэн бол Н.Золжаргал 14, М.Бадрах 13 оноо, 12 дамжуулалт, Б.Батжавхлан 11 оноог авчээ. 

2015 ОНЫ ҮНДЭСНИЙ АВАРГА БАГ ДУНДГОВЬ АЛЬЯНС ТЕХ ХАРЦАГА!

Цуврал: 4:2 ("Дундговь Альянс Тех Харцага")

"Дундговь Альянс Тех Харцага" vs "Дорнод Танан Гарьд" 105:97

"Дорнод Танан Гарьд" vs "Дундговь Альянс Тех Харцага" – 118:113 /Нэмэлт цаг/

"Дундговь Альянс Тех Харцага" vs "Дорнод Танан Гарьд" – 90:95

"Дорнод Танан Гарьд" vs "Дундговь Альянс Тех Харцага" – 70:82

"Дундговь Альянс Тех Харцага" vs "Дорнод Танан Гарьд" – 91:76

V.02 "Дорнод Танан Гарьд" vs "Дундговь Альянс Тех Харцага" – 87:98

6 сар гаруй хугацаанд үргэлжилсэн Үндэсний Супер Лигийн 2014-2015 оны Үндэсний Аваргуудын нэр тодорлоо.

Үндэсний Аваргын төлөөх цувралын 6 дах тоглолт Д.Содномзундуй агсны нэрэмжит Хандгайт дахь Үндэсний сагсан бөмбөгийн ордонд боллоо. Харцага баг цувралыг 3:2 харьцаатай тэргүүлж байсан тул тэд энэ өдөр ялалт байгуулахад аварга болох боломжтой байсан юм. Гэхдээ тоглолт эхнээсээ тун ширүүхэн эхэлж, аль аль багууд оноогоор дутуу явахыг хүссэнгүй. Тоглолтын эхнээс Харцагын хамгаалагч D.Rambo довтолгоо, хамгаалалтанд тун идэвхитэй байж олон олоог авч чадсан юм. Харин Гарьдуудаас A.Jones олон талын тоглолт үзүүлж байлаа. Эхний хагаст багийнхаа сайн тоглуулж чадаж байсан юм. Тоглолтын эхний хагас тэнцүүхэн өндөрлөсөн бөгөөд M.Anderson багтаа хэд хэдэн чухал оноогоор тус болж байсныг дурдах хэрэгтэй. Улмаар 3-р үед ч багууд тэнцүүхэн тоглосон бөгөөд, ихэнхи тохиолдолд багууд хувийн хамгаалалт хийж байсан нь энэ тоглолт ямар чухал байсныг илтгэсэн юм. Гарьдуудаас О.Ууганбаяр энэ өдөр будагтай талбайд бус урд шугаманд тоглосон нь үр дүнгээ өгч, довтолгоонд тун сайн тоглолт үзүүлж байсан юм. Гэхдээ Гарьдуудын шидэгчид болох Б.Мөнхболд, Ц.Азбаяр нарын шидэлтүүд тийм ч сайн байсангүй. Энэ өдөр тэд хамтдаа 3 оноог л авсан юм. Харин Харцага багаас S.Pledger мөн л тийм ч найдвартай шидээгүй ч чухал үед хэрэгтэй оноонуудыг авч, тоглолтын төгсгөлд торгуулийн шидэлтүүдээ алдалгүй шидэж байсан юм. 4-р үед ч Rambo сайн тоглолтоо үргэлжлүүлж байсан бол Г.Баттөрийн 3 дараалсан холын шидэлт багтаа тун их тус хүргэсэн бол, Д.Дорждамба ч дундын зайн шидэлтүүдээ оноо болгож байснаар баг нь онооны давуу байдлыг үүсгэж чадсан. Улмаар төгсгөлийг S.Pledger найдвартай хийснээр 98:87 харьцаатай Харцага баг ялалт байгуулж, цувралыг 4:2 болгон дуусгаснаар Үндэсний Аваргууд боллоо.

Тэд ингэснээр сагсан бөмбөгийн Дээд лигт 2003, 2006, 2007, 2011 онуудад Аварга цол хүртээд байсан бол 2015 онд 5 дах удаагаа Үндэсний Аварга цолыг хүртэж байна. Тус цувралд гайхалтай тоглолт үзүүлж, 28.5 оноо, 6 самбараас бөмбөг авалт, 6 оновчтой дамжуулалт дунджилснаар хамгаалагч D.Rambo ОУХМ Т.Түвшинбаярын нэрэмжит Финалын Үнэ Цэнэтэй Тоглогчоор нэрлэгдлээ. Харцага баг Үндэсний Аварга цолыг хүртэж, 40 сая төгрөг, Аваргын цом, Алтан медаль, Аваргын бөгж, малгай, цамц, цагаар шагнуулсан юм.