Дэлхийн банкны Монгол Улс дахь суурин төлөөлөгчөөр Украины иргэн Андрей Михнев томилогдож, өнөөдрөөс /2019.04.01/ ажилдаа орлоо.  Тэрбээр  Монголд  Дэлхийн банкны бодлогын хэлэлцүүлэг болон хэрэгжих буй хөтөлбөрүүдийг удирдан ажиллах юм байна.  Дэлхийн банк  нь  хувийн хэвшил, иргэний нийгмийнхэнтэй хамтран Монголын Засгийн газрын тогтвортой, хүртээмжтэй өсөлтөд хүрэх, ядуурлыг бууруулах бодлого ба олон нийтийн үйлчилгээг сайжруулах дэмжиж, тусладаг.  Андрей Михнев энэ талаар "Би ирэх жилүүдэд Монголд ажиллаж, Монголын хөгжил дэвшлийн төлөө Засгийн газар ба бусад гол оролцогч  талуудтай хамтран ажиллах гэж байгаадаа тун баяртай байна. Монгол Улсыг эдийн засгийн өсөлт, бүх нийтийн ахиц дэвшилтэд хүргэх замд хөтлөх мэдлэг туршлага, санхүүгийн хэрэглүүрүүд Дэлхийн банканд хангалттай байгаа гэдэгт би итгэлтэй байна” гэжээ.

Дэлхийн банк 2019 оны гуравдугаар сард Монгол Улсад оруулах тусламж болон зээлийн хэмжээгээ 230 сая ам.доллараар нэмэгдүүлсэн билээ. Хөдөлмөр, нийгмийн хамгаалал, эрчим хүч, боловсрол, засаглал гээд маш олон салбарыг хамарсан төрөл бүлийн төсөл хөтөлбөрүүд Монгол Улсад Дэлхийн банкны санхүүжилтээр хэрэгжиж байна. Дэлхийн банк санхүүгийн дэмжлэгээс гадна Монголын дунд болон урт хугацааны хөгжлийн зорилтуудыг сайжруулах зорилгоор аналитик болон зөвлөх үйлчилгээнүүдийг үзүүлдэг.

Ноён Михнев нь олон улсад эдийн засгийн хөгжлийн салбарт 20 гаруй жил ажилласан туршлагатай билээ. Тэрбээр Монголд ирэхийнхээ өмнө Ойрхи Дорнод болон Персийн булангийн орнуудад өрсөлдөх чадвар ба хувийн хэвшилд дөрөөлсөн өсөлтийг нэмэгдүүлэх зорилготой Дэлхийн банкны хөтөлбөрийг удирдаж байсан юм. Үүнээс өмнө Ноён Михнев Латин Америк, Саб-Сахар Африк, Өмнөд Ази, Ойрхи Дорнод, Хойд Африк, Европ, Төв Ази зэрэг олон оронд эдийн засгийн өөрчлөн шинэчлэлт хийх ажлуудад төвлөрөн ажиллаж байв. Михнев нь Киевийн Их сургуульд олон улсын эдийн засгийн докторын зэрэг хамгаалсан бөгөөд англи, украин, орос хэлээр чөлөөтэй ярьдаг.

Харин Герман улсын иргэн Мартин Рейзер Хятад, Монгол, Солонгос улсуудыг хариуцсан Дэлхийн банкны шинэ захирлаар өнгөрсөн гуравдугаар сарын 1-нээс ажиллаж эхэлсэн. Тэрбээр Бээжин хотод суурьшин ажиллаж байна.

Б.БАТ