ХААН Банк “Asiamoney” сэтгүүлээс Монгол Улсын Шилдэг банк болон Шилдэг цахим банк шагналыг хоёр дахь жилдээ хүртээд буй билээ. Энэ сарын 25-нд Хонконг хотоос ХААН Банкны Мэдээллийн технологи хариуцсан дэд захирал Панкаж Пател шагналаа гардаж аваад ирсэн юм. Түүнтэй уулзаж ярилцлаа.

-Юуны өмнө олон улсын нэр хүндтэй “Asiamoney” сэтгүүлээс хос шагнал хүртсэн танай банкны хамт олонд баяр хүргэе!

-Баярлалаа. Манай банкны ерөнхий үзүүлэлтүүд, шинээр нэвтрүүлж буй ажлуудыг үнэлэн “Монгол Улсын шилдэг банк”, “Шилдэг цахим банк” хэмээх хүндтэй шагналыг хүртээсэн болов уу гэж бид үзэж байна. Миний хувьд мэдээллийн технологийн хэсгийг хариуцаж, банкны цахим банкны чиглэлээр хийж байгаа ажлуудтай холбоотой байдаг тул ялангуяа “Шилдэг цахим банк” гэсэн шагналдаа сэтгэл хангалуун байгаа.

-ХААН Банкны хувьд өнгөрсөн жил ололт амжилт арвин байсан. Ялангуяа цахим банкны чиглэлээр маш олон шинэлэг ажлыг нэвтрүүлсэн байх аа?

-Өнөөдөр Монгол Улсад хийгдэж байгаа интернэт банкны гүйлгээний 40 гаруй, АТМ-ын гүйлгээний 80 гаруй хувь, ПОС-ын гүйлгээний 44 хувийг ХААН Банк дангаараа гүйцэтгэж буй. ХААН Банкны хэмжээнд нийт гүйлгээний 95 хувь нь цахимаар дамжиж, үлдсэн тав орчим хувийг л харилцагчид салбар нэгж дээр очиж биеэр хийж байна. Өнгөрсөн жил бид цахим банкныхаа платформ буюу интернэт банк, аппликэйшнээ шинэчиллээ. Ингэснээрээ харилцагчид шинэ үйлчилгээнд бүртгүүлэх, зээл авах, карт захиалах, данс нээлгэх гэх мэт үйлчилгээг салбарт очихгүйгээр хийх боломжтой болсон.

-Нүдэнд харагдаж, гарт баригдахгүй энэ олон гүйлгээг танай банк дангаараа гүйцэтгэдэг гэхээр ард нь маш их програм хангамж, тоног төхөөрөмж, хүн хүч ажилладаг байх,  тийм үү?

-Тэгэлгүй яах вэ. ХААН Банкны хувьд өмнө нь хамгийн олон салбартай гэдгээрээ олонд танигдсан байсан бол сүүлийн дөрөв, таван жилд хийсэн хөрөнгө оруулалт, багийн ажлын үр дүнд харилцагчдын цаг завыг хэмнэсэн өнөөдрийн энэ цахим банкны сүлжээ бий болсон гэсэн үг. Сүлжээ гээд байгаа нь цахим банкны бүтээгдэхүүн үйлчилгээг аль ч худалдааны цэг, байршилд 24 цагийн турш авах тоног төхөөрөмж бүхий дэд бүтцийг бас хэлээд байна л даа. Өөрөөр хэлбэл, карт уншигч машин, ATM байршуулсан байх, гар утсаараа шууд гүйлгээ хийгээд явах боломжийг бүрдүүлэх гэх мэт асар том сүлжээ, дэд бүтэц байгуулж байж цахимжуулна. Мэдээж таны хэлснээр хүн хүч ажиллана, шинэчлэл засвар гээд тоочиж барахгүй нүсэр ажил зэрэгцээд явж байдаг.

-Бас киоск машин шинээр нэвтрүүлсэн байх аа. Энэ төхөөрөмж ATM-аас юугаараа ялгаатай вэ? 

-Тийм ээ. Өнгөрсөн жил Монголын зах зээлд анх удаа банкны үйлчилгээний Киоск машиныг нэвтрүүллээ. Одоогийн байдлаар бид Улаанбаатар хотод найман байршилд өөртөө үйлчлэх Киоск машин байршуулаад байна. Энэ машинаас банкны салбар тооцооны төвд хандан  авдаг  тодорхойлолт, дансны хуулга, өртэй, өргүй лавлагаа зэргийг хэвлэн авч, мөн хүссэн банк руугаа бэлэн бусаар гүйлгээ хийх боломж бүрдсэн. Үүнээс гадна онлайн теллертэй шууд холбогдож, зөвлөгөө мэдээлэл авах харилцуурыг энэ төхөөрөмжид суурилуулж өгсөн. Энэ бүх үйлчилгээг цогцоор нь шийдсэнээрээ заавал банк явах шаардлагагүй өдөр шөнийн аль ч  цагт банк санхүүгийн хэрэгцээгээ авах боломжтой гэсэн үг. Энэ бүхэн банкны үйлчилгээг илүү энгийн хялбар, аюулгүй болгож, ингэснээр харилцагчид маань амьдралынхаа чухал цаг хугацааг гэр бүлдээ, өөр хэрэгтэй зүйлдээ зарцуулах боломжийг бид олгож өгч байгаа юм.

-2019 он гараад багагүй хугацаа өнгөрлөө. Энэ жилийн хувьд цахим банкны байр сууриа бататгах чиглэлээр ямар ажлууд хийхээр төлөвлөж байна вэ?

– Цаашдаа бид цахим сувгууддаа төвлөрнө. Үнэндээ хэрэглэгчид ч салбаруудад ирж үйлчилгээ авахыг хүсэхгүй байна. Салбарт үзүүлдэг үйлчилгээг гар утас, интернэтээр авах боломжийг бүрдүүлбэл хүмүүсийн цагийг ч хэмнэнэ. Иймд хэрэглэгчид илүү хялбар, шуурхай үйлчилгээ үзүүлэхээр ажиллаж байна. 2019 онд бид банкныхаа бүх цахим сувгуудыг нэгтгэсэн Omni-channel платформыг нэвтрүүлэхээр дэлхийд нэртэй Infosys компанитай хамтран ажиллаж байна. Энэ нь харилцагчид цахим үйлчилгээг илүү хялбар авах, банк шинэ үйлчилгээнүүдийг илүү хурдан зах зээлд нэвтрүүлэх боломж олгох юм. Өөрөөр хэлбэл, харилцагчид мобайл, лаптоп, таблет ямар ч төхөөрөмжөөс ялгаагүй  харилцагчийн үйлчилгээг нэгэн ижил стандартаар авах боломж бүрдэх юм. Цахим банкинд хийсэн энэ инноваци, харилцагчийн үйлчилгээг сайжруулж байгаа энэ бүх ажил эргээд бидэнд маш олон боломж олгоно гэж найдаж байна.

-Австрали, Сингапур улсад, дэлхийн банкуудад ажиллаж байсан мэргэжилтний хувьд Монгол Улс тэр тусмаа ХААН Банкыг сонгож ажиллах ямар шалтгаан байв?

-Миний хувьд Энэтхэг үндэстэн боловч мэдээллийн технологийн энэ сайхан мэргэжлийнхээ ачаар дэлхийн хүн болж, олон оронд ажиллаж амьдраад нэлээдгүй хугацааг өнгөрөөж. ХААН Банкинд ажиллахын өмнө Австралийн ANZ банк, RBS     (Royal Bank of Scotland) зэрэг банкуудад мэдээллийн технологийн багийг удирдаж байсан. ХААН Банкны хувьд мэдээллийн технологи хариуцсан дэд захирлын ажлын байр олон улсад зарласан байсны дагуу хүмүүстэй зөвлөж сонирхоод орсон. Монгол Улсын хамгийн том банкинд ажиллаад жил гаруйн хугацаа өнгөрч байна. Энэ хугацаанд хамт олонтойгоо нэг баг болж, нийслэл Улаанбаатар хот болон алслагдсан хөдөөгийн аймаг сумдад амьдарч байгаа харилцагчдынхаа ажил амьдралд хэрэгтэй бүтээгдэхүүн үйлчилгээг нэвтрүүлж үр дүнг нь хүртэж яваадаа сэтгэл хангалуун байдаг. Гэхдээ бид төгс болсон гэж хэлэхгүй. Цаашид харилцагчдад илүү үнэ цэнийг бий болгосон бусад орны дэвшилтэт технологи, сайн туршлагад суурилан банкныхаа бүтээгдэхүүн үйлчилгээг бүх түвшинд сайжруулах, үйлчилгээ авах хурдыг нэмэгдүүлэх гэх мэт олон ажил хийх төлөвлөгөөтэй байна.

-ХААН Банкны  нийт харилцагчдад хандаж юу хэлэх вэ?

-ХААН Банкны өнөөдрийн ажлын үр дүн, сайн сайхан бүхэн нийт харилцагчид та бүхний хамтын ажиллагаа, харилцан итгэлцлийн үр дүн юм. Амжилт бүрийг хамтдаа бүтээдэг эрхэм харилцагчид, түншүүд та бүхэндээ баярлалаа. Илүү хялбар, илүү цаг зав хэмнэсэн дараагийн шинэлэг бүтээгдэхүүнтэй удахгүй уулзана гэж найдаж байна.