Нийслэлийн “Найрсаг Улаанбаатар” хөтөлбөрийн хүрээнд зохион байгуулж байгаа “PlayTime-2015” амьд хөгжмийн наадам ирэх зургадугаар сарын 27, 28-ны өдрүүдэд “Монгол шилтгээн”-д болно. “Play Time-2015” наадам 14 дэх жилдээ зохион байгуулагдаж байгаа бөгөөд Улаанбаатар хотын орчин үеийн хөгжмийн соёлыг хөгжүүлэх, залууст амралт чөлөөт цагаа цэвэр агаарт өнгөрүүлэх, дэлхийн болон Монголын шинэ, шилдэг амьд хөгжмийн хамтлаг дуучдыг танилцуулах замаар тэдний хөгжмийн боловсролыг дээшлүүлэхэд наадмын гол зорилго оршиж байгаа ажээ.

“PlayTime-2015” наадам “PlayTime”, “Шинэ Давалгаа”, “Нааглихац” гэсэн гурван тайзаар дамжуулан дэлхийн болон Монголын амьд хөгжмийн 40 гаруй хамтлаг дуучдын уран бүтээлийг толилуулна. Үүнд Америкийн алдарт “Pains of Being Pure at Heart”, ”SSIGHBORGGG”, Өвөр Монголын “Есөн-Эрдэнэ” зэрэг дэлхийн алдарт амьд хөгжмийн хамтлагууд болон Монголын алдарт “Никитон”, “Нисванис”, “The Lemons”, “Моханик”, “The Colors”, “Rec On”, “Цонхон дээр суусан ялаа” зэрэг шилдэг хамтлаг болон DJ нар оролцоно.

Тус наадам хоёр хоног үргэлжлэх бөгөөд эхний өдрийн тоглолтыг Америкийн алдарт “Pains of Being Pure at Heart”, хоёр дахь өдрийн тоглолтыг “Никитон” хамтлаг тус тус манлайлан тоглох байна.

Үүнээс гадна Replay яармагийг наадмын үеэр зохион байгуулах бөгөөд энэ нь наадмын үеэр хотын залуус хог хаягдлаа хэрхэн багасгах, зөв зохистой ашиглах, өөрсдийн бүтээлч сэтгэлгээг хөгжүүлэх урлагийн хөтөлбөрийг хэрэгжүүлнэ. Replay яармаг нь “PlayArt”, “PlayKids”, “PlayMerchandise” зэрэг өртөөнөөс бүрдэнэ. Энэ удаагийн “PlayTime-2015” наадмын бас нэг онцлог нь “Underground” кино наадамд оролцож байсан шилдэг богино хэмжээний уран бүтээлүүдийг хамтлагийн тоглолтын дундуур үзүүлнэ. Мөн дэлхийн хэмжээнд намар нээлтээ хийхээр төлөвлөж байгаа Курт Кобейны амьдралын тухай баримтат киног албан ёсны эрхтэйгээр үзүүлэхээр болжээ.

“Play Time-2015” наадмын тасалбар нэг өдрийн 30,000₮, хоёр өдрийн 40,000₮ төгрөгийн үнэтэй. Мөн VIP тасалбарыг оролцогчдод санал болгож байгаа ба тус үйлчилгээгээр Монголын шилдэг амьд хөгжмийн уран бүтээлчидтэй танилцаж, тэдэнтэй хамт ая тухтай орчныг өнгөрүүлэх боломжтой юм байна. VIP тасалбар нэг өдрийн 100,000₮, хоёр өдрийн 160,000₮ үнэтэй байна.

Б.БИЛГЭЭ