Энх цагт хоёр ч цэрэг эндэж, ээж, аавынх нь нулимс хатаагүй, цөхрөл гомдол дунд өдөр хоногийг өнгөрөөж байхад Ерөнхий сайд цэрэг, танк, зэр зэвсэг болсон Өмнөд Суданаас мэндчилгээ дэвшүүлж, зүрх зүсэв. Хариуцлага алдсан хэний ч толгойг Засгийн газрын тэргүүн илэхгүй гэх амлалт хаа очоод бүдэрчих нь энэ вэ.

Энхийг сахиулагчдаа эргэх нь Ерөнхий сайдын айлчлалаараа амжуулах ажлын нэг байж болох ч Монгол Улсын энхийг эрхэмлэнэ гэх гадаад бодлогын үзэл баримтлалыг хаана гээж орхив оо. Танк “уначихсан”, буу шийдэм болсон зураг, хөрөг нь Засгийн газрын тэргүүнийг хүчтэй, дайчин гэхээс илүүтэй зэвсэгт мөргөлдөөнийг л өдөөсөн сурталчилгаа болж буулаа.

Олон нийт ч шүүмжилж байна. “Захаа босгосон Ерөнхийлөгчийн мэндчилгээ гудамжны улс төрийг санагдуулдаг байсан бол танктай, буутай Ерөнхий сайдын зураг фашист дэглэм санагдууллаа” гэж…

Дэлхийн халуун цэг болсон, зэвсэгт мөргөлдөөнтэй бүс нутагт үүрэг гүйцэтгэнэ гэдэг амаргүй. Амаргүй алба хааж байгаа энхийг сахиулагчдадаа баяр хүргэж, дэлхийн энх тайвны үйлсэд оруулж буй үйлсэд нь талархлаа биечлэн хүргэх нь зөв боловч улс төрийн зорилго болгон, рекламандаа ашиглах хэрэг байсан юм уу. Дэндүү өндөр үнэ төлж, сурталчилгаагаа Өмнөд Суданд хийлгэлээ гэж шуугицгааж байна. Зөв шүү дээ. Хоёр их наядын алдагдалтай төсөв баталсан атлаа айлчлал нэрээр татвар төлөгчдийнхөө мөнгийг цацаад явах хэрэг үү. Үүгээр бол айлчлалын үнэ цэнэ ч алдагдаж зөвхөн рекламны шторк бэлтгэхээр явдаг ажил болж хувирав.

Уг нь Ерөнхий сайдад улс орноо эмхэтгэхэд хийх ажил тоймгүй болон бий. Одоо хэр нь Их Британи, Өмнөд Солонгос зэрэг орнуудад Монгол Улсыг төлөөлөх Элчин сайдууд томилогдоогүй үүрэг гүйцэтгэгчтэйгээр ажил үүргээ гүйцэтгэж байна. Гуравдагч хөршүүдээсээ хөрөнгө оруулалт татах нь Засгийн газрын бодлого юм бол ядаж л хоёр жил шахмын хугацаанд эзэнгүй байгаа улсууддаа Элчин сайд нарыгаа томилох асуудлыг цэгцлэх яриа хөөрөөг хийж, ээлжит бус чуулганаар шийдвэрлүүлэхэд анхаардаггүй юм уу.

Төрд хариуцлага, шударга ёсыг бэхжүүлэх нь үнэн юм бол Увс, Зүүнбаянгийн цэргийн ангийн хоёр ч цэрэг амиа алдсан атал хариуцлага хөндөгдөхгүй байна вэ. Зүүнбаянд амиа алдсан цэргийг эрүүл мэндийн хувьд асуудалтай, зүрх нь ачаалал даахгүйгээс амьсгал хураасан гэсэн шинжээчийн дүгнэлт гаргажээ. Хэрэв гүйлтийг даахгүй хэмжээний биетэй байсан юм бол эрүүл мэндийн үзлэгт яагаад тэнцэв. Хоёр ч удаагийн эрүүл мэндийн шалгалтад тэнцэж, эрүүл гэсэн оношийг эмч нар тавьсан байсныг ар гэрийнхэн нь ярьж байна.

Завхан аймгийн цэрэг Увсын хилийн цэрэгт алба хааж байгаад амиа алдсан хэрэг явдалд одоо хэр нь Зэвсэгт хүчнийхэн тоймтой хариулт өгөхгүй л байна. Тувад хэрэг нь шалгагдаж байгаа л гэх.

Шүүхийн шийдвэр гүйцэтгэлийн ерөнхий газрын харьяа 461 дүгээр Урьдчилан саатуулах байранд шүүгч Л.Бямбаа амиа алдсанаас хойш багагүй хугацаа өнгөрлөө. Хариуцлагыг хэн хүлээх вэ. Төр нь эр цэрэгт татаад, төр нь цагдан хорьж байгаад амь нас нь эндэж байна. Хэнд итгэх вэ, ард түмэн.

Бүтээн байгуулалт хийнэ л гэдэг. Яг юу хийсэн юм бэ. Хоёр жил шахам болох гэж байхад Ардчилсан намыг Засгийн газар барьж байх үед зурагдсан ажлууд дээр л очиж тууз хайчилж шоу хийж байна. Өөрсдөө санаачлаад хэрэгжүүлсэн ажил гэвэл юу байна вэ. Яармагийн дэнжид Төрийн орон сууцны захиалгаар 800 айлын орон сууц баригдсан ч хүндээ хүргэж чадахгүй хэдэн сар алдав. Засгийн газраас журам гаргаж байж, хүмүүсийн хүсэлтийг авна л гэдэг. Дахиад хэдэн сар хүлээх вэ.

Улсын хэмжээнд 30 мянга гаруй орон сууц ашиглалтад орсон байгаа ч ипотекийн зээлд хамрагдах иргэд зээлээ хүлээсээр.  Эх үүсвэртээ баригддаг ипотекийн зээлийн учрыг олж болдоггүй юм уу. Энэ мэтчилэн дурдвал дотооддоо хийх, хэрэгжүүлэх ажил олон ажил байна. Цэргийн баярын сурталчилгаа хийх гэж хүссэн юм бол зардлаа танаад эвлүүлээд хийсэн ч болох л байлаа. Төсвийн мөнгө ёолдоггүй гэж үнэн юм даа.

Г.ХОРОЛ