Төв аймгийн Заамар сумын нутаг дэвсгэрт үйл ажиллагаа явуулдаг “Эко Алтан Заамар” ХХК-ийн уурхайд  осол өнгөрсөн сарын 28-ны өдөр гарч  хоёр техник, зургаан хүн дарагдсан юм. Хоёр хүнийг  нурангиас гарган  эмнэлэгт хүргэсэн бол Онцгой байдлын  ерөнхий газрын /ОБЕГ/  алба хаагчид үлдсэн дөрвөн хүнийг эрэн хайх ажиллагааг үргэлжлүүлж байгааг албаны эх сурвалж хэллээ.

Уурхайн ослын улмаас дарагдсан дөрвөн хүний тухайд Баянхонгор, Булган, Улаанбаатар хотын харьяалалтай, 31-55 насны ажилчид бөгөөд ажилчдын ар гэрийнхэн нь ослын  газарт  ирсэн байна.

Тус компанийн удирдлагуудын зүгээс ослыг  газар хөдлөлтөөс болж гарсан байж болзошгүй гэж үзжээ. Учир нь  осол гарахаас нэг өдрийн өмнө 22.45 цагт Төв аймгийн Заамар сумын нутаг дэвсгэрт буюу осол болсон газраас 24 км-ийн зайд 4.06 магнитутын газар хөдлөлт болсон ч холбогдох байгууллагууд ослын шалтгааныг өөрөөр дүгнэж буй. Урьдчилсан дүгнэлтээр 80 орчим метрийн өндөр хана нурсан, талбайн хэмжээг 5400м2 гэж үзжээ.

Хөрсний нуралт болсон уурхайд аврах багийг ахлан ажиллаж буй  ОБЕГ-ын дэд дарга, хурандаа Б.Ууганбаяр ослын талаар  “Осол гарсан өдөр уурхайн талбайд ажиллаж байгаад дарагдсан дөрвөн хүний хоёр нь эксковатор болон бульдозертойгоо шороонд дарагдсан бол насос дээр ажиллаж байсан хоёр хүн нурангиас зугтаж байгаад дарагдсан байна. Ажилчид хаана байж болзошгүй вэ гэдгийг тогтоочихсон. Гэсэн ч усны түвшин өндөр, нэмж хана даган ус урсч байгаа, дахин нуралт үүсэх эрсдэлтэй байна" гэсэн юм.

Нурангийн талбайд хөрсний усны ундрага ихтэй, уурхайн хананаас ус урсаад байгаа учир дахин нуранги үүсэх эрсдэлтэй, аврах ажиллагаа явуулахад хүндрэлтэй байгаа аж. Одоогийн байдлаар аврагчид 80 метрийн гүнд нурангид дарагдсан дөрвөн иргэн, хоёр техник рүү хүрч очих зам тавьж, усыг соруулах хоолойн холболтыг хийж байна. 

Энэ талаар ОБЕГ-аас тодруулахад "Эрлийн ажиллагаа үргэлжилж байна. Бид шаардлагатай арга хэмжээ авч ажиллаж байна" гэсэн юм. Мөн усыг шавхахын тулд олон тооны насос хэрэгтэй бөгөөд тус компанид өмнө нь ашиглаж байсан гурван ч насос ослын улмаас нурангид дарагдсан байна. Тиймээс зэргэлдээх уурхайнуудаас насос татаж ашиглаж эхэлжээ.  Энэ асуудалтай холбоотойгоор уурхайн үйл ажиллагааг түр зогсоон, ажилчдыг гэрт нь буцаасан байна.  Мөн бульдозерыг татан гаргахын тулд троссын холболтыг хийхээр дөрвөн аврагч дөрвөн метрийн гүнтэй, шавартай усанд 1-6 удаагийн шумбалт хийгээд байгаа аж.

Э.БУРАМ