Улсын Драмын эрдмийн театрын хамт олон Монголын төрөөс баримталж буй соёлын урлагийн бодлогыг хэрэгжүүлэх ажлын хүрээнд хөдөө орон нутгийн иргэдэд соёл урлагаар хүрч үйлчлэх, театрын урлагийг сурталчлах зорилготой байдаг. Тиймээс “УДЭТ-ын өдрүүд” аялан тоглолтыг 2002 оноос эхлэн аймгуудын Засаг даргын тамгын газар, Боловсрол, соёл, урлагийн болон мэргэжлийн урлагийн байгууллагуудтай хамтран амжилттай зохион байгуулж, хөдөө орон нутгийн иргэд, үзэгчдийн талархлыг хүлээсээр ирсэн билээ. Тэгвэл энэ уламжлалт аялан тоглолт энэ сарын сүүлээр эхлэхээр болжээ. Тодруулбал, Орхон, Дархан-Уул, Сэлэнгэ аймгуудад дөрөвдүгээр сарын 23-наас тавдугаар сарын 3 хүртэл “Театрын өдрүүд” аялан тоглолтыг тоглохоор уран бүтээлчид бэлтгэлдээ ороод байна.

УДЭТ-ын өдрүүд аялан тоглолтын хөтөлбөрт театрын урын санд тоглогдож буй дэлхийн сонгодог, үндэсний түүхэн, орчин үеийн, хүүхэд залуучуудын сэдэвтэй шилдэг уран бүтээлүүдээсээ дээжлэн хүргэх юм. Үүнд:

1. Б.Цогнэмэх “Тэнгэрийн хүү” үндэсний түүхэн жүжиг
2. А.Очирбат “Буруугүй буруутан” бэсрэг уянгын драмын жүжиг
3. Н.Ганхуяг “Бүүвэй “бэсрэг уянгын драмын жүжиг
4. С.Жаргалсайхан “Хэлж зүрхлээгүй хайр” орчин үеийн жүжиг
5. Нобелын шагналт Дарио Фо “Чөлөөт хос” хайрын жүжиг
6. С.Михалков “Бардам туулай” хүүхдийн жүжиг зэрэг бүтээлүүдийг тоглох юм.

Мөн бүхий л насны үзэгчдийн оюуны таашаалыг хүлээсэн уран бүтээлүүдээ 50 хувь хүртэлх хөнгөлөлттэй үнээр толилуулахаас гадна уран бүтээлчид, үзэгчдийн уулзалт ярилцлага зохион байгуулах, орон нутгийн урлагийн байгууллага, театр, чуулгын хамтын ажиллагааг өргөжүүлэх зорилгоор харилцан туршлага, мэдээлэл солилцох зэрэг ажлуудыг зохион байгуулахаар төлөвлөжээ.

Тоглолтын хуваарийг хүргэж байна.

• IV сарын 23, 24, 25, 26-нд Орхон аймгийн Уурхайчин ордон, Хүүхэд залуучуудын театрт
• IV сарын 27-нд Сэлэнгэ аймгийн Хөтөл-д
• IV сарын 28, 29, 30-нд Дархан-Уул аймгийн Залуучуд театрт
• V сарын 1, 2-нд Сэлэнгэ аймгийн Сэлэнгэ долгио чуулга-д
• V сарын 3-нд Сэлэнгэ аймгийн Зүүнхараа, “Мөнгөн хараа” чуулгад тус тус тоглоно.

Б.БИЛГЭЭ