Ардын жүжигчин, хөгжмийн зохиолч П.Хаянхярваагийн “Цэргийн нөхөр Цэрэнтэйгээ” цомгийн баяр өнөөдөр Зэвсэгт хүчний жанжин штабын Үлгэр жишээ үлээвэр найрал хөгжмийн байранд боллоо. Цомгийн баярт Хаянхярваагийн  гэр бүл, найз нөхөд нь баяр хүргэхээр хүрэлцэн ирсэн ба Үлгэр жишээ үлээвэр найрал хөгжмийн хөгжимчид түүний уран бүтээлийн дээжээс хүрэлцэн ирсэн олонд хөгжимдөж толилууллаа.

Монгол улсын Ардын жүжигчин, хөгжмийн зохиолч П.Хаянхярваа 500 гаруй дуу, 30 марш, 2000 найруулга, бүжгийн том  хэмжээний зургаан чуулбар хөгжим, хоёр киноны хөгжмийг тус тус зохиож байжээ. “Цэргийн нөхөр Цэрэнтэйгээ” цомог удахгүй худалдаанд гарах юм байна

“Цэргийн нөхөр Цэрэнтэйгээ” цомгийн продюсер Б.Энхбаясгалан:

-Ардын жүжигчин Хаянхярваа гуай олон  сайхан уран бүтээл хийсэн боловч одоог хүртэл уран бүтээлээ нэгтгэсэн байдлаар гаргаж байгаагүй юм байна. Тиймээс Хаянхярваа гуайн уран бүтээлийг дэмжиж, хайрладаг хүмүүс нийлж, сарын өмнөөс түүний уран бүтээлийг цомог болгохоор зорьж, ажлаа эхэлсэн. Энэ цомог нь 13 хөгжмийн бүтээл, дуунаас бүрдсэн. Хөгжмийн бүтээлүүд бүгд хуучны бичлэгээрээ байгаа. Мөн тухайн үед түүний дууг дуулж байсан дуучид, хөгжимчдийн бичлэг энэ цомогт багтсан.  

Б.БИЛГЭЭ