БНСУ-ын Чанвон хотноо болж буй буудлагын "Дэлхийн цом"-ын 25 метрийн спорт гар бууны эмэгтэйчүүдийн дасгалд өрсөлдсөн Монгол Улсын Гавьяат тамирчин, Хөдөлмөрийн баатар, олимпийн мөнгөн медальт Отрядын Гүндэгмаа алтан медаль хүртсэнээр "Рио-2016" олимпийн наадамд оролцох эрхээ албан ёсоор өвөртөллөө.

Өнөөдөр болсон 25 метрийн спорт гар бууны эмэгтэйчүүдийн дасгалд нийт 70 буудагчаас өрсөлдөж,  Монгол Улс, "Алдар" спорт хороо, Уулын баяжуулах "Эрдэнэт" үйлдвэрийн "Хангарьд" спорт хорооны тамирчин О.Гүндэгмаа түрүүлж, БНХАУ-ын залуу буудагч Лин Юемей, Болгарын буудагч, "Дэлхийн цом"-ын аварга Бонева Антонета нар хоёр, гуравдугаар байрт шалгарчээ. О.Гүндэгмаа гавьяат  582 оноогоор 7-р байраар финалд шалгарсан байгаа. Монголын бусад тамирчид болох ОУХМ Т.Баярцэцэг 575 оноогоор 32, ОУХМ Ц.Мөнхзул 569 оноогоор 49 дүгээр байр тус тус эзэлсэн байна.

Ийнхүү Хөдөлмөрийн баатар О.Гүндэгмаа "РИО-2016" Олимпийн наадамд орох Монголын тамирчдын анхны эрхийг эх орондоо авчирснаар 1996 оны Атлантагийн олимпоос хойш зургаа дахь олимпдоо оролцох болзол хангаад байна.

Б.ЭНХ