Монголын хөлбөмбөгийн холбооноос зохион байгуулдаг “Үндэсний дээд лиг”-ийн 12 удаагийн аварга “Эрчим” баг өнөөдөр нэгэн чухал тоглолтыг эх орныхоо талбайд хийлээ.

“AFC Cup” буюу “Азийн цом”-ын тэмцээний “Play off”-ын тоглолтод Монголын “Эрчим” болон БНАСАУ-ын “Рёмёнг” клубууд тоглохоор оноолт таарсан. Өнөөдрийн тоглолт 3:0-оор зочин баг болох “Рёмёнг” багийн ялалтаар өндөрлөлөө.

Хоёр багийн хариу тоглолт хоёрдугаар сарын 27-ны өдөр Пхеньян хотод болно.

“Рёмёнг” клуб 2018 онд улсынхаа дээд лигийн хоёрдугаар байрт орсноор “Азийн цом”-ын урьдчилсан шатанд өрсөлдөх эрхийг авчээ. Тэд хариу тоглолтод хожвол “Азийн цом”-ын тэмцээний дараагийн тойрогт тоглох юм.

Монголын “Эрчим” баг Үндэсний дээд лигийн тэмцээнд 12 удаа түрүүлснээс сүүлийн дөрвөн улиралд дараалан аваргын цомыг өргөсөн шилдэг багийн нэг билээ.