Төрөөс ажлын байр нэхэхгүйгээр өдрийн хоолны мөнгөө олж байсан хувиараа такси эрхлэгчдийг торгох шийдвэрийг Нийслэлийн тээврийн газраас гаргаж, хэрэгжүүлж эхэлснээр зургаан ч иргэнийг тус бүр 100 мянган төгрөгөөр торгосон билээ. Эл шийдвэрийг олон нийт эсэргүүцэж, Засгийн газрын өнөөдрийн хуралдаанаас цуцалсан. Иймээс 100 мянган төгрөгөөр торгуулсан зургаан иргэний мөнгийг буцаан өгч хохиролгүй болгох нь шударга биз.

Ногоон гэрэл ассан үед гарцаар гараад явж байгаа явган зорчигчийг дайрчих шахаад давхиад өнгөрч буй жолоочид ямар ч хариуцлага тооцохгүй хэрнээ өөртөө ажлын байр бий болгоод, дүрэм журмаа мөрдөөд явж буй иргэнийг хувиараа такси үйлчилгээ эрхэлж байна гэсэн үндэслэлээр торгож, дарамтлах нь чухамдаа бол тээврийн цагдаа нарын халаасыг түнтийлгэх л буруу арга болж хувирна. Ингэж муйхарлахын оронд нийтийн тээврээ яаж хөгжүүлэх вэ, нийслэлчүүдийн хэрэгцээг гүйцэхгүй байгаа зөвшөөрөлтэй такси эрхлэгч компанийг яаж хурдан хугацаанд хөгжүүлэх вэ гэдгийг л анхаарах ёстой шүү дээ.

Нийтийн тээврийн үйлчилгээнд явж байгаа хэдэн автобусныхаа үйлчилгээг сайжруулж чадахгүй байж, хувиараа такси үйлчилгээ эрхлэгчдийг дарамтлах юм бодож олж байдаг энэ нийслэлийн Тээврийн газар, Тээврийн цагдаагийнхан гэж дүүрчихсэн ч улсууд байх юм даа.

Г.ХОРОЛ