Нэг компани нийслэлийн 23 байршилд барилга барих эрх авчээ | News.MN

Нэг компани нийслэлийн 23 байршилд барилга барих эрх авчээ

Нэг компани нийслэлийн 23 байршилд барилга барих эрх авчээ

БСШУС-ын сайд Ё.Баатарбилэг

Нийслэлийн хэмжээнд 2018 онд нийт 38 байршилд сургууль, цэцэрлэгийн зориулалтаар газар чөлөөлсөн. Үүнээс улсын төсвийн хөрөнгөөр хэрэгжих 23 сургууль, цэцэрлэгийн газрыг чөлөөлжээ.  Гэвч газар чөлөөлсний нөхөн олговрыг олгох хөрөнгө дууссан зэрэг нь газар чөлөөлөлтөд бэрхшээл учирдаг аж. Мөн тендерээ зарлаж чадаагүй байж байгаад батлуулсан төсвөө хураалгасан асуудал ч үүсчээ. 

Энэ мэт асуудлын талаар БСШУС-ын сайд Ё.Баатарбилэг өнөөдөр /2019.02.19/ нийслэлийн удирдлагуудтай Хангарьд ордонд уулзаж, ярилцлаа.


Нийслэлд сургууль, цэцэрлэгийн барилга шинээр барих, өргөтгөх ажлыг явуулахад газар чөлөөлөлтийн асуудал их хүндрэлтэй байдаг талаар нийслэлийн Засаг даргын орлогч Ш.Анхмаа танилцуулсан юм. Тэрбээр “Нийслэлийн хөрөнгө оруулалтын газар болон нийслэлийн Боловсролын газраас хийсэн судалгаагаар ямар байршилд ямар сургууль, цэцэрлэг барих вэ гэдгийг гаргаад өгчихсөн байдаг. Гэтэл энэ судалгааг холбогдох яам, тамгын газарт явуулсан боловч судалгааны дагуу төлөвлөлт оруулж ирээгүй. Үүнээс болж, нийслэлд өнөөдөр газар чөлөөлөлтийн асуудал дээр хүндрэл гарсан. Бидэнд газар чөлөөлөлтийн төсөв байхгүй байсан учраас нөхөн олговортой холбоотой зардлаас мөнгө гаргаж, газар чөлөөлөлтийн асуудлыг шийдээд явсан байгаа” гэв.

Түүний илтгэлд мөн боловсролын салбарт нийслэлийн төсвийн хөрөнгө оруулалтаар 2018 онд хийсэн ажлуудыг танилцуулж байлаа. Өнгөрөгч онд боловсрол, соёлын салбарт нийт 80 төсөл арга хэмжээг хэрэгжүүлэхээр 13 тэрбум 119.1 сая төгрөгийн хөрөнгө батлагдсанаас гүйцэтгэл, үр дүнг тооцон 11 тэрбум 737.6 сая төгрөгийн санхүүжилтийг олгожээ. Үүнээс хийсэн ажлуудыг дурдвал.

1.2017-2018 он дамжин хэрэгжсэн долоон цэцэрлэгийн барилга угсралтын ажилд 5 тэрбум 599 сая төгрөг

2.Сургуулийн автобус төсөлд 398 сая төгрөг

3.ЕБС-д хөгжлийн бэрхшээлтэй хүүхэд суралцах, сургалтын орчин бүрдүүлэхэд 177.6 сая төгрөг

4.Усан хангамж, ариутгах татуургын шугамд холбогдоогүй сургууль, цэцэрлэгт жишиг ариун цэврийн байгууламж барихад 281.2 сая төгрөг

5.Сургууль орчмын хөдөлгөөний аюулгүй байдлыг сайжруулах ажилд 500 сая төгрөг

6.Сургууль, цэцэрлэгийн их засварт 566 сая төгрөг

7.Зураг төсөл боловсруулахад 415 сая төгрөг

8.Бусад боловсрол, соёлын арга хэмжээнд 3 тэрбум 799 сая төгрөг

 Улаанбаатар хотын хэмжээнд 2018-2019 оны хичээлийн жилд төвийн зургаан дүүргийн 23 сургуулийн 188 бүлэгт 7743 хүүхэд гурван ээлжээр хичээллэж байна. Гурван ээлжээр хичээллэж буй сургуулийн тоо 2016 онд 31 байсан бол гурван жилийн дараа найман сургуулиар багассан тухай албаныхан онцолж байлаа.

Энэ жил боловсролын салбарт нийт 162 сургууль, цэцэрлэгийн төсөл хөтөлбөр хэрэгжүүлэхээр 239 орчим тэрбум төгрөгийг боловсролын салбарын хөрөнгө оруулалтад суулгажээ. Боловсролын яаман дээр нийтдээ боловсролын салбарын барилга барих 499 төсөл хэрэгжиж байгаагийн нэг хэсэг нь 2018 онд ажлаа эхлүүлсэн бол зарим нь энэ ондоо тендерээ зарлаад ажлаа эхлэх гэнэ.

Мөн өнгөрөгч 2018 онд боловсролын салбарын барилга барих тендерээ зарлаж чадаагүй төсвөө хураалгасан 10 хөрөнгө оруулалтын ажил байгааг мэргэжилтнүүд хэлсэн. Уг уулзалтын үеэр БСШУС -ын сайд Ё.Баатарбилэг Төрийн өмчийн бодлого зохицуулалтын газрын дэд дарга А.Дагвадоржид боловсролын салбарын барилгын тендерийн хугацааг 2019 оны дөрөвдүгээр сарын 31-ний өдрийн дотор зохион байгуулахыг даалгасан юм.

Мөн энэ үеэр БСШУС-ын сайд Ё.Баатарбилэг 2013 оноос хойш нийслэлийн 23 байршилд сургууль, цэцэрлэг барих ажлыг нэг компани авчихаад одоо хүртэл барилгын ажил дуусаагүй байгаа асуудлыг цэгцлэхийг албаныханд үүрэг болголоо.

Анх Засгийн газрын 317 дугаар тогтоолоор 72 бага сургууль, цэцэрлэгийн цогцолбор барихаар “Рич голден буллс эдукэшн” компанитай гэрээ байгуулжээ. Дараагаар нь 2015 онд Засгийн газрын хуралдаанаар тус компанийн концессын гэрээг цуцалж, “Топ интернэшнл инженеринг монголиа” компанид шилжүүлсэн байна. Гэвч 2016 оны 12 дугаар сарын 1-нд Улсын дээд шүүхийн тогтоолоор “Рич голден буллс эдукэшн” компанид олгосон эрхийг сэргээж, 2018 онд тус компанийг барилгын ажил үргэлжлүүлэх эрхийг Засгийн газрын 115 дугаар тогтоолоор олгосон байна.

Ё.БААТАРБИЛЭГ: НЭГ КОМПАНИ 23 БАЙРШИЛД СУРГУУЛЬ, ЦЭЦЭРЛЭГ БАРИХ ЗӨВШӨӨРӨЛ АВСАН ХАРИУЦЛАГАГҮЙ АСУУДАЛ БАЙНА

-Өнгөрсөн жилүүдэд нийслэл дээр хэрэгжихээр төлөвлөсөн боловсролын салбарын барилгын ажлууд тодорхой шалтгааны улмаас саатаж ирсэн. Тухайлбал, газар чөлөөлөлт, тендерийн хугацаа хойшилсон зэрэг олон шалтгаанаар хоцорч зарим төсөв буцаан татагдах эрсдэл бас үүсэж байсан. Тийм учраас боловсролын салбарын 2019 оны төсөл хөтөлбөрүүдийг хэрэгжүүлэхэд тал талын оролцоог сайжруулах шаардлагатай байгаа учраас уулзаж, ярилцлаа. Уулзалтын үеэр зарим хувийн хэвшлийн байгууллага Засгийн газрын концесс нэрээр 23 байршлыг нэг компани нэр дээрээ сургууль, цэцэрлэг барина гээд авчихсан асуудал байна. Энэ асуудалтай эвлэрэхгүйгээр 2013, 2014 онуудад Засгийн газраас концесс батлаад нийслэлийн хэмжээнд 23 газрыг нэг компани авч, барилгын ажил нь 5-50 хувьтай олон жил болж байгаа асуудал байна. Энэ асуудлыг Засгийн газрын шийдвэртэй бол шийдвэрийг нь өөрчлөх тал дээр ажиллана.

Г.ГАНБАЯР: БОЛОВСРОЛЫН САЛБАРЫН УРСГАЛ ЗАРДАЛ 2022 ОНД 2 ИХ НАЯД ТӨГРӨГТ ДӨХНӨ

-Салбар яамны зүгээс 2019 оны намраас эхлэн ерөнхий боловсролын сургуулийн сурагчдыг гурван ээлжээр хичээллүүлэхгүйн тулд шинэ сургууль барихаас гадна хамран сургах тойргийн асуудлыг дахин зохицуулах болно. Жишээлбэл, зэргэлдээ хоёр дүүргийн сургуульд нэг нь 40, нөгөөд нь 65 хүүхэд суралцаж байна. Тиймээс сургуулиудын хамран сурах тойргийг дахин боловсруулъя. Хоёрдугаарт хувийн их, дээд сургуулийн тоог цөөлөх бодлого баримталж ажиллана. Энэ дагуу хувийн их, дээд сургуулиудын ашиглаж буй сургалтын зориулалтаар баригдсан барилгыг түрээсийн зориулалтаар ашиглаж эхэлнэ. Учир нь цаашдаа боловсролын салбарын урсгал зардал хүндэрнэ. Өнөөдрийн байдлаар 1.4 их наяд төгрөгийн урсгал зардлыг боловсролын салбарт зарцуулж байгаа. Энэ жил гэхэд улсын хэмжээнд 162 сургууль, цэцэрлэг шинээр ашиглалтад орно. Үүнийг дагасан урсгал зардал гэхээр 2022 оноос энэ салбарын урсгал зардал 2 их наяд төгрөгт дөхнө. Энэ үед боловсролын салбарын төсвийг Монгол Улсын улсын төсөв даах уу” гэж байв.

 

 

"Болор дуран"-аар шалгав.
Энэ мэдээнд өгөх таны сэтгэгдэл?
3
ЗөвЗөв
2
БурууБуруу
0
ХахаХаха
0
ХөөрхөнХөөрхөн
0
ГайхмаарГайхмаар
0
ХарамсалтайХарамсалтай
0
ТэнэглэлТэнэглэл
Баярлалаа!

Холбоотой мэдээ

8 сэтгэгдэл

News.mn сайтад сэтгэгдэл оруулахад анхаарах зүйлс

Avatar

Зочин 2019-02-19 103.229.121.22

ОДОО ХУУЛЬ ГАРГАЖ ЦЭЦЭРЛЭГ, ЕРӨНХИЙ БОЛОВСРОЛЫН СУРГУУЛЬ ЗЭРГЭЭС БУСДААР ОФФИС БАРИЛГА БАРИХЫГ ХОРИГЛОХ, МӨН ХОТЫГ БҮСЧЛЭЛД ХУВААН БААР ЦЭНГЭЭНИЙ ГАЗРУУДЫН ТООГ ХХУЛИАР ХЯЗГААРЛАЖ ӨГӨХ, МӨН ХУУЛЬ ГАРГАЖ ГЭР ХОРООЛЛЫН ХАШАА ХООРОНДЫН ГУДАМЖНЫ ХЭМЖЭЭГ ӨРГӨН БОЛГОХ, ТОДОРХОЙ ГАЗРУУДАД ГАЗАР ОЛГОХЫГ ХОРИГЛОХ ГЭЭД ЗӨНДӨӨ ХИЙХ АЖЛУУД 76 МАЛД БАЙГААД БАЙДАГ ГЭТЭЛ МАЛНУУД НЬ...

Avatar

Зочин 2019-02-19 202.21.106.125

Одоо 22-ын товчооноос Гачуртын уулзвар, 7 буудлаас Яармаг хүртэлх зайнд орон сууц офис шинээр барихыг хориглое. Хуучнаа нураагаад тэр хэмжээний байр барихыг харин зөвшөөрч болж байна. УБ орчим цоо шинээр газар аваад барилга барья гэвэл Налайх, Багануур, Зуунмод, Майдар, Жаргалант, Лүн гээд барих газар зөндөө байна. Ер нь Төв аймгийг УБ хоттой нийлүүлэх хэрэгтэй

Avatar

МОНГОЛ 2019-02-19 66.181.165.246

Монголын барилгын компаниудын эзэд шиг тэнэг улсууд дэлхийд байна уу? эхлээд барилгаа шавааралдуулж барьчихаад дараа нь зам гэж бараг машин зөрөх аргагүй балиар юм дундуур нь сүлжилдүүлж тавьдаг??? Тэрийг нь зөвшөөрдөг, ашиглалтанд хүлээж авдаг барилга, хот байгуулалтын яам, улсын комиссынхон гэж "илжиг" гэхэд ч багадмаар балиар юмнууд???

Avatar

МОНГОЛ 2019-02-19 66.181.165.246

Ер нь Улаанбаатарыг баахан замбараагүй шавааралдуулсан байшин шиг юмаар дүүргэж байгаа гол буруутанууд нь энэ барилгын компаниуд!!! Тийм учраас одоо хотод, баригдсан барилгуудын дунд байшин барихыг бүр мөсөн хоригломоор байна аа!!! Барилга барих газар байхгүй байгаа биз дээ? Харин ч одоо сул чөлөөтэй байгаа газруудын зөвшөөрлийг нэн даруй цуцалж, ногоон байгууламж, цэцэрлэгт хүрээлэн болгох хэрэгтэй байна!!!

Avatar

ЦОЛМОН 2019-02-19 202.5.198.35

ЭРХ БАРИГЧДЫН ШУНАЛЫН СЭТГЭЛ БОЛОВСРОЛЫГ ДАМПУУРУУЛЖ БАЙНА БҮХ СУРГУУЛИЙН УДИРДЛАГУУДЫГ МАШ САЙН ШАЛГАХ ХЭРЭГТЭЙ ДУНД СУРГУУЛИУДЫН ЗАХИРАЛУУДАД ИХ ЮМ БАЙГАА ШИНЭЭЭР ЗАЛУУЧУУД АЖИЛД АВАХ СОНИРХОЛ ИХТЭЙ БАЙГАА ЧИНЬ ЖАРАН ТЭРБУМЫН ҮР ХӨВӨРӨЛ БАЙГААГ ИЛЧЛЭЭД БАЙГАА ЮМ ШИНЭ САЙДАА ДУНД СУРГУУЛИУДЫН БОЛОН БҮХ СУРГУУЛИЙН УДИРДЛАГЫГ ХАМТ ОЛНЫ САНАЛААР СОНГОЖ АЖЛЫГ НЬ ХАМТ ОЛНЫ ОРОЛЦООТОЙ ДҮГНЭХ ХЭРЭГТЭЭ ЭНЭ БОЛ БОЛОВСРОЛЫН ШИНЭЧЛЭЛИЙН СУУРЬ ШҮҮ

Avatar

түвшин 2019-02-19 150.129.142.225

Хүний нөөц, санхүүгийн чадавхи, машин механизм, тоног төхөөрөмжийн хангамж, өмнө гүйцэтгэсэн ажлын чанар байдлын дүгнэлтэд тулгуурлахгүйгээр нэг компанийг нэгэн зэрэг олон тендерт шалгаруулдгаас шалтгаалж ноцтой үр дагаврууд гадагаас гадна хүлээж авдаг коммис нь тухайн баригдах байгууламжид, мѳн тухайн барилга байгууламжид ажиллах, ашиглах байгууллагуудаас холбогдох ажлын хэсэг, хараат бус иргэдийн хѳндлѳнгиййн явцын хяналтыг тавьж байх эрх зүйн зохицуулалт хэрэгтэй юм шиг ...

Avatar

Зочин 2019-02-19 122.201.22.147

Нөхөн олговор гэгч нь мөнгө олох хэрэгсэл болжээ. Иймд нөхөн төлбөрийг улсын төсвөөс биш, тэр зөвшөөрөл өгч авлига хээл хахууль авсан шийдвэр гаргагчдаар төлүүлэх хэрэгтэй

Avatar

нөхөн олговор? 2019-02-19 202.21.127.161

Нөхөн олговор гэгч нь мөнгө олох хэрэгсэл болжээ. Угаасаа сургууль, цэцэрлэг, эмнэлэг барьж, зам тавих зэргээр нийтийн эзэмшилд зориулах ёстой газрыг зориуд хувьчилж өгч авалцчихаад дараа нь нөхөн төлбөр нэрээр зүгээр мөнгө олдог сүлжээ болсон байна. Иймд нөхөн төлбөрийг улсын төсвөөс биш, тэр зөвшөөрөл өгч авлига хээл хахууль авсан шийдвэр гаргагчдаар төлүүлэх хэрэгтэй

NewsMN Гар утасны хувилбар Татах
NEWS.mn

Мэдээллийн эх сурвалж