Францын цомын тэмцээний хагас шигшээ тоглолтууд явагдаж дууслаа. Энэ сарын 7-ны өдөр "Осер" клуб талбайдаа "Генгам" клубыг хүлээн авч тоглон, 1-0 харьцаатай хожил байгуулсанаар шигшээ тоглолтод шалгарсан. Тэгвэл тэдэнтэй хүч үзэхээр "ПСЖ", "Сент-Этьен" клубүүд тунаж үлдээд байсан бөгөөд Францын нийслэлийн баг болох "ПСЖ" талбайдаа "Сент-Этьен"-ийг 4-1 харьцаатай бутниргэснээр "Осер" клубтэй шигшээ тоглолтод тоглохоор боллоо.

Тоглолтын 21 дэх минутад Швед довтлогч Златан Ибрахимович тооны харьцааг нээсэн. Ингэснээр Златаны хувьд Францын нийслэлийн багт гурван жилийн өмнө нэгдэж байсан цагаас хойш өдийг хүртэл өөрийн 100 дахь гоолоо оруулсан нь энэ байсан юм. Мөн түүний гоол үүгээр зогсоогүй бөгөөд 81 болон 90 дэх минутад тус тус гоолдсоноор клубын түүхэн дэх хамгийн олон гоол оруулсан тоглогчдын хоёрдугаар байрт бичигдсэн юм.

Мөн энэ өдөр клубын өөр нэг довтлогч болох Лавесси тоглолтын 60 дахь минутад гоолдсоноор багийнхаа хожилд хувь нэмэр оруулсан бол эсрэг багийн нэр төрийн ганц гоолыг 25 дахь минутад Амума оруулсан байна.

Тэмцээний шигшээ тоглолт ирэх сарын 31-нд явагдана.

Эх сурвалж: www.mminfo.mn