Завханчуудын нэгдсэн золголтод зориулсан бөхийн барилдаан Бөхийн өргөөнд өнгөрсөн баасан гаригт болсон билээ. Тус барилдаанд улсын гарьд Б.Гончигдамба, Улсын харцага Ш.Уламбаяр, Т.Бэгзсүрэн, улсын начин Б.Чимэдвандан нарын 56 бөх хүч сорьжээ.

Энэхүү барилдаанд Завхан аймгийн Их-Уул сумын харьяат "Алдар" спорт хороо, "Тэргэн нуур" ХХК-ийн бөх, улсын гарьд Батнасангийн Гончигдамба зургаа даван түрүүлж, Отгон сумын харьяат "Алдар" спорт хороо, Зэвсэгт хүчний 325-р анги, "Хаан даатгал" ХХК-ийн бөх, улсын харцага Төрмөнхийн Бэгзсүрэн үзүүрлэсэн байна

Их шөвөгт Тосонцэнгэл сумын харьяат Монгол Улсын харцага Шүхэрийн Уламбаяр, Их-Уул сумын харьяат улсын начин Батцэнгэлийн Чимэдвандан нар шалгарчээ.

Б.Гончигдамба гарьд түрүү бөхийн бай буюу телевизороо өөрийн сумын харъяат “Болор цом”-36 наадмын тэргүүн байрын эзэн Базарсадын Баттулгад бэлэглэсэн байна.

Б.ЖАРГАЛ