Ардчилсан оюутны холбооны залуус “Ам асууя” хөдөлгөөнийг Ерөнхий сайд У.Хүрэлсүхээс эхлүүлж буйгаа мэдэгдлээ. Тус холбооны залуус өнөөдөр /2019.02.14/ хийсэн хэвлэлийн бага хурлын үеэр эрх баригч МАН 2016 оны  сонгуулийн үеэр зарласан мөрийн хөтөлбөрөө өнөөдрийг хүртэл биелүүлээгүй гэдгийг онцолсон. Иймд сонгуулийн үеэр эрх баригчдын худал мөрийн хөтөлбөр зарладаг байдлыг таслан зогсоож, ёс зүйгүй урлаг, соёлын зүтгэлтнүүд болон бизнесменүүдтэй тэмцэх болно гэдгийг тодотгосон.

Энэ талаар Ардчилсан холбооны залуусын ерөнхийлөгч Н.Лхагвадорж “Бидний ард буй  мянга мянган оюутан залуусын саналд үндэслэн Ардчилсан оюутны холбооны залуус “Ам асууя” хөдөлгөөнийг өнөөдрөөс эхлүүлж байна.

Монгол Улсын хэмжээнд сонгууль бүрт дарга нарыг дагаж дэмждэг урлаг соёлын зүтгэлтэн, төрийн соёрхолт, бизнесмен, улстөрчид маш олон болсон. Бид тэднээс ам асууна. Тэр тусмаа 2017 оны Ерөнхийлөгчийн сонгуулийн үеэр Ерөнхийлөгчид нэр дэвшсэн УИХ-ын дарга асан М.Энхболдыг дэмжин ажиллаж байсан соёл урлаг, спортын маш олон алдартан өнөөдөр чимээгүй байна. Мөн саяхан шударга ёс хэмээн ярьж байсан УИХ-ын гишүүн Л.Оюун-Эрдэнэ, Т.Аюурсайхан нар  М.Энхболдын цүнхийг нь барьж явсан. Гэтэл М.Энхболд даргыг 2017 оны Ерөнхийлөгчийн сонгуульд ялагдсаны дараа  хэрхэн нүүрээ буруулж байгааг та бүхэн харж байгаа.  Шударга ёс ярьж, ЖДҮ-ийн зээлийн хулгайг мартсан Л.Оюун-Эрдэнэ, Т.Аюурсайхан танаас Монголын ирээдүй болсон оюутан залуус бид ам асуух болно” гэлээ.

Ардчилсан оюутны холбооны залуус “Ам асууя” хөдөлгөөнийг 14 хоног бүрт зохион байгуулж, худал амлалт өгсөн улстөрчдөд амлалтаа биелүүлэхийг шаардсан албан тоот бичиг хүргүүлэх аж.