Германы “Байерн”-ийн хагас хамгаалагч Франк Рибери австри хамгаалагч Давид Алабагийн гэмтлийн талаар ийнхүү ярьжээ. Алаба шигшээ багтаа хийсэн тоглолтын үеэр гэмтэл авч долоон долоо хоног талбайд гарах боломжгүй болоод байгаа юм.

“Бидний хувьд ч, түүнийг гэр бүлийн хувьд ч, ер нь клубын хэмжээнд ч энэ бол хэцүү асуудал. Тэр манай багт дэндүү чухал тоглогч. Өвлийн завсарлагын өмнө тэр гэмтэлтэй байгаад талбайдаа гарсан. Тэр сүүлийн тоглолтууд форм сайтай, тоглолт нь үнэхээр гайхалтай байсан. Бид маш чухал хөлбөмбөгчөө алдчихлаа.

Одоо Алаба аль болох тайван байж, аливааг өөдрөгөөр харах хэрэгтэй. Давид сэтгэлзүйн хувьд хатуужилтай хүн болохоор энэ хүнд үеийг давна. Харин бидний хувьд энэ гэмтэл маш аюултай зүйл боллоо. Тэр аль болох л хурдхан талбайдаа эргэн гарах хэрэгтэй. Учир нь маш хэрэгтэй тоглогч” гэж Рибери өгүүлжээ.

Эх сурвалж: http://horom.mn