Хойд туйлын хүйтэн агаарын урсгал АНУ-ыг бүхэлд нь нөмөрч, сургууль, албан байгууллагууд хаагдаж, шуудангийн үйлчилгээг түр зогсож, тус улсын түүхэнд тохиогоогүй их хүйтэн өвөл болж байгаа ажээ. АНУ-ын баруун хэсгийн төвийн бүс нутгийн хэмжээнд эмзэг бүлгийн иргэд, орон гэргүй хүмүүс, ахмадууд, орон сууцны оршин суугчдыг хүйтнээс хамгаалах ажлууд хийгдэж буй юм байна. Орон гэргүй хүмүүсийг дулаан байлгах үүднээс автобусанд хүртэл байрлуулжээ.

Лхагва гаригт агаарын температур цельсийн хасах 21-40 хэм хүрч хүйтэрсэн байна. Линкольны амьтны хүрээлэн, Урлагийн сургууль, Филдийн музей лхагва гаригт ажиллаагүй аж. Хүйтний улмаас лхагва гаригт Иллинойс, Висконсин, Мичиган зэрэг мужийн эрх баригчид онц байдал зарлажээ. "Брүүкфилд" амьтны хүрээлэн 85 жилийн дараа анх удаагаа хаалгаа барьсан аж. АНУ даяар өнөөдрийн байдлаар 1100 гаруй нислэгийг цуцалсан байна.

Их цасны улмаас тус улсад мягмар гаригт дөрвөн хүн амиа алдаж, олон зуун өрхийн цахилгаан, дулаан доголдож, хөлдөж үхэх эрсдэл нүүрлэсэн гэж албаныхан мэдэгджээ. Зарим мужид 30 см хүртэл цас орсон байна. Тус улсын эрх баригчдын мэдээлж буйгаар 55 сая орчим иргэнд тусламж хэрэгтэй байгаа бөгөөд нөхцөл байдал хүндэрсэн мужууд руу аврагчдыг илгээжээ.

Чикаго хотын захаар энэ долоо хоногийн эцэст Антарктидын зарим хэсгээс ч илүү хүйтрэх тул цаг уурчид иргэдийг орон гэрээсээ гарахгүй байхыг анхааруулсан байна.

Эх сурвалж: The Daily Herald