“Эрдэнэт”-ийн 49 хувийг Сингапурын компанид зарсан гэх мэдээллийг зарим УИХ-ын гишүүн дэлгэсэн. Уг мэдээллийг  "Монголын зэс" корпорацийн зүгээс үгүйсгэж “Эрдэнэт” үйлдвэрийн 49 болоод 51 хувь 100 хувь Монголын талд бүртгэлтэй байгаа. “Эрдэнэт” үйлдвэрийн ТУЗ-ийн долоон гишүүн болон ерөнхий захирал нь төрөөс томилогдсон хүмүүс. Ийм тохиолдолд бид ямар нэгэн худалдаа хийх, гадаадын компанид зарах хэлцэл хийгээгүй гэдгийг мэдэгдсэн билээ.

Энэ талаар ЗГХЭГ-ын дарга Г.Занданшатараас тодруулахад  “Эрдэнэт” үйлдвэр өнөөдрийн байдлаар  УБЕГ-т 100 хувь Засгийн газрын мэдэлд байгаа” гэдгийг тодотгов. Тэрбээр “Шүүхийн шийдвэр гарсан ч гэсэн 49 хувийг шилжүүлээгүй, ямар нэг өөрчлөлт ороогүй. “Эрдэнэт”-ийн ТУЗ-д Засгийн газраас томилогдсон төлөөлөл байгаа. Тийм учраас аливаа хувь зарагдсан гэх мэдээлэл байхгүй. Шүүхийн шийдвэрийг хэрэгжүүлэх Шадар сайдаар ахлуулсан ажлын хэсэг ажиллаж байна” гэсэн тайлбарыг өглөө.