УИХ-ын гишүүн Л.Оюун-Эрдэнэд нэр нь тодорхойгүй этгээдээс нисч ирсэн баримт өнгөрсөн баасан гаригт дуулиан тарилаа. Энэ бол “Монголиан коппер корпорэйшн” компанийн хувьцаа эзэмшигчдийн 2019 оны нэгдүгээр сарын 19-ний хуралдааны шийдвэр байв. Эрхэм гишүүний мэдээлсэн уг шийдвэрээр цагаан сараас өмнө “Эрдэнэт үйлдвэрийн 49 хувийг Сингапурын компанид зарах гэж байна гэсэн нь олны анхаарлыг татсан юм. Тодруулбал,  “Монголиан коппер корпорэйшн”-ийн хувьцаа эзэмшигч Ц.Пүрэвтүвшингийн эзэмшлийн 1.120.010 /нэг сая нэг зуун хорин мянга арван/ ширхэг энгийн эрхийн хувьцааг бүхэлд нь буюу нэг бүрийн 100 мянган төгрөг, нийт 112.001.000.000.00 төгрөг буюу 41.999.535.00 ам.доллараар Сингапур улсад бүртгэлтэй “Эрдэнэт Корп Пти Лтд” компанид худалдсугай” гэсэн заалт болон энэ эрхийг олгох шийдвэр гаргасан “хэргийн эзэн” Ц.Пүрэвтүвшингийн гарын үсэгтэй хувьцаа эзэмшигчийн шийдвэр албан ёсных мөн эсэх нь эргэлзээ төрүүлсэн.

Эргэлзээ төрүүлэхийн учир нь одоогийн байдлаар Эрдэнэт үйлдвэрийн 49 хувийг эзэмшигч нь Монгол Улсын иргэн Ц.Пүрэвтүвшингийн “Монголиан коппер корпорэйшн” ХХК бөгөөд хувьцаа эзэмшилтэй холбоотой маргаан шүүхээр эцэслэн шийдэгдэн ч Засгийн газар, Улсын бүртгэлийн ерөнхий газар шүүхийн шийдвэрийг биелүүлээгүй байгаагийн улмаас “Эрдэнэт үйлдвэр”-ийн хувьцаа эзэмшигч нь Монголын төр хэвээр байна. Үүнийг ч тухайн өдөр “Монголиан коппер корпорэйшн” ХХК-аас гаргасан мэдэгдэлд тодорхой дурджээ.

“МСС” ХХК-ийн захирал Ц.Пүрэвтүвшингээс энэ талаар лавлахад “Ор үндэсгүй ташаа мэдээлэл байна. Монголиан коппер корпорэйшн ийм шийдвэр гаргаагүй. Энэ мэдээг уншаад ямар аймаар юм бэ” гэж бодсон. Нэгэнт ийм хэлцэл болоогүй учраас худал мэдээлэл улс төрийн зорилгоор тараасан асуудлыг хуулийн байгууллагад хандаж шалгуулна” гэсэн юм.

Тэгэхээр Төрийн мэдэлд 100 хувь байгаа “Эрдэнэт үйлдвэр”-ийн хувьцаанаас 49 хувийг нь Сингапурын компанид зарах, шилжүүлэх, ямар нэг байдлаар хөдөлгөх боломжгүй. Гэвч Ц.Пүрэвтүвшин эзэнтэй монгол компаниас Ц.Пүрэвтүвшин эзэнтэй Сингапурын компанид зарсан гэх хувьцааны наймааны талаар хэн ч тодорхой тайлбар хийгээгүй байгаа юм. Хэрэв ийм наймаа болсон бол төрийн өмчөөс хулгайлсан хэрэг болох талтай бөгөөд холбогдох албан тушаалтнууд хариуцлага алдсан байж болохоор харагдаж байна. Энэ асуудал заавал шалгагдах ёстой.

Нөгөөтэйгүүр УИХ-ын гишүүн Л.Оюун-Эрдэнэд энэ мэдээлэл хаанаас, ямар замаар ирэв. Яагаад яаран мэдээлэл хийх болов. Ядаж хэнээс ирснийг нь мэдэж байж мэдээлэл өгөхгүй бол болохгүй гэж бодогдсонгүй юу гэдэг нь анхаарал татаад байгаа юм.

“МСС” компаниас гаргасан мэдэгдлээс харахад  “Эрдэнэт” үйлдвэр Монголын мэдэлд гэдгийг онцлоод хувьцаа эзэмшигчдийн хурлын шийдвэр “жинхэнэ үү, хуурамч уу” гэдгийг тайлбарлаагүй. Гэвч энэ бүхнийг улс төрийн зорилготой гэж үзэж байгаагаа мэдэгджээ. Цаг хугацааны хувьд анзаарвал УИХ-ын дарга “ Ирэх мягмар гаригт ажлаа өгнө, сар шинээр дараагийн УИХ-ын дарга томилогдсон байх болно” гэдгийг өөрийн биеэр мэдэгдсэний дөнгөж дараахан Л.Оюун-Эрдэнэ тэргүүтэй гишүүд дээрх мэдэгдлийг хийсэн. Үүгээрээ үнэхээр улс төрийн зорилго агуулсан бол УИХ-ын даргыг ажлаа өгөхөөс өмнө амжиж уг хуурамч мэдэгдлийг түүнтэй уячхаад явуулах ёстой байсан юм болов уу.

Төрийн мэдлийн өмчийг хувийн хэвшлийнхнээс булаах ажиллагаа цаашид үргэлжлэхээ зарлачихсан. УИХ-ын шийдвэрээр хувь эзэмшиж ажиллаж байгаа зарим ордыг төрд буцааж авна гэсэн. Зарим орд дээр очиж гүйцэтгэх ажиллагаа явуулсан. Их нийгэмчлэлийн үе ирсэн нь харагдаж байна. Энэ бүхнээ улс төрийн зорилгоор ашиглах, явдал газар авахаар шинжтэй байгаа ийм үед УИХ-ын нэр бүхий гишүүд буцах хаяггүй цаасаар мэдэгдэл хийсэн нь яарсан, болчимгүй үйлдэл төдийгүй олон нийтэд баталгаагүй мэдээлэл өгч төөрөгдөлд оруулах сөрөг үр дагавартай.

Эрдэнэт үйлдвэрийн хувьцааны асуудал, холбогдох маргаануудын талаар эцэслэн шийдэгдээгүй хангалттай олон ноцтой баримтуудыг дэлгэж болно. Гэсэн ч “Стандарт” банкинд төлөх өрийн тухай ярихад бүгд зайлсхийдэг. Хэрэв дээрх хувьцаа эзэмшигчдийн хурлын шийдвэр үнэн байсан бол хувьцааг эзэмшиж буй төрийг төлөөлж ЗГХЭГ-аас эхлээд хариуцлага асуух хүн олон бий. Төрийн өмчийг улстөржүүлэх, түүнд хэн нэг нэгнийг болгоомжгүйгээр холбогдуулчхаад хариуцсан эзэнгүй алга болдог байдал үүгээр үргэлжилж байна. Харин Ц.Пүрэвтүвшингийн монгол компаниас Ц.Пүрэвтүвшингийн сингапур дэх компанид хувьцаа шилжсэн эсэх асуудал тодорхойгүй хэвээр үлдээд байгаа юм. Учир нь тэд удаа дараа лавласан ч дэлгэрэнгүй тайлбар өгсөнгүй.