Энэ долоо хоногт нөөцийн мах худалдаанд гарах учраас Хүнс хөдөө аж ахуйн яамны Төрийн нарийн бичгийн дарга Н.Ариунболдоор ахлуулсан ажлын хэсэг мах бэлтгэлийн “Мах маркет”, “Хүнс импекс” компани дээр өнөөдөр ажиллалаа.

“Мах импекс” компанийн хувьд 3,112,1 тн нөөцийн мах бэлтгэсэн бөгөөд жижиглэнгээр савлан баглаж байна хэмээн захирал Г.Будрагчаа танилцуулав. Тэрээр “Манайх гэрээний дагуу 3000 гаруй тонн мах бэлдэхээс ямааны мах 78 тонн илүү, хониных 1218 тонн, үхрийнх 917 тонныг тус тус бэлдсэн. Энэ жилийн хувьд МХЕГ, ОБЕГ, Монголбанкнаас нөөцийн мах бэлтгэлд хяналт тавьсан учраас өмнөх жилүүдээс илүү чанартай. Хэдий цаг хугацааны хувьд хожуу худалдаанд гарч байгаа ч, зах зээлийнхээс хямд учраас борлуулалт гайгүй байна байх. Худалдаанд гаргахад бэлэн” хэмээн мах ангилан савлах цех болон нөөцөлсөн зоорь саваа үзүүлсэн юм. 

Харин “Мах маркет” компанийн хувьд 3,006,5 тн нөөцийн мах бэлтгэжээ. Бэлтгэл ажлаа бүрэн хангасан хэмээн гүйцэтгэх захирал Л.Болор танилцууллаа. Мөн тэрээр нийтдээ 3000 тонн мах бэлтгэснээс үхэр, ямаа тус бүр 900 тонн, үлдсэн нь хонины мах. Маргааш, нөгөөдрөөс худалдаанд гаргаж эхэлнэ гэв.  

Хүн амын хүнсний хэрэгцээнд зориулж энэ жил 14,544,6 тн нөөцийн мах бэлтгэсэн юм. Албаныхны өгч буй мэдээллээр маргаашнаас эхний үйлдвэрүүд сүлжээ дэлгүүрүүдээр махаа борлуулж эхэлнэ. Тэгэхээр энэ сарын дундуур гэхэд борлуулалт нь жигдэрчих боломжтой аж.

Харин үнийн тухайд нийслэлийн зургаан дүүргийн 800-1000 орчим дэлгүүрээр жижиглэнгийн үнээрээ үхрийн ястай мах кг нь 5950, цул нь 8500, хонины ястай мах кг нь 5750, ямааны ястай мах кг нь 4900, цул нь 6500 төгрөгөөр тус тус худалдаалах юм.

Г.НАРАН