Мэргэжлийн сүмо бөхийн Хацү башё өнөөдөр өндөрлөнө. Токио хотод болж буй Хацү башёгийн өчигдрийн барилдаанд сэкивакэ Тамаваши Б.Мөнх-Оргил Аояамагаар 12 даваагаа авч түрүү авахад тун ойртлоо. Түүний араас Такакэйшо 11 даваа, гурван унаатай удаалж байна.

Их аварга Хакүхо М.Даваажаргал өчигдрийн барилдаанд дэвжээнд гарсангүй. Түүнтэй барилдах байсан озэки Гоэйдо ялалт авснаар тавин хувийн /8-6/ амжилтаа үзүүлэв. Хакүхо энэ башёг 10 даваа, дөрвөн унаатай өндөрлүүллээ.

Хацү башёгийн түрүү бөхийн төлөө барилдаж буй сэкивакэ Тамаваши Б.Мөнх-Оргил өнөөдөр Эндотой барилдах бол сэкивакэ Такаэйшо озэки Гоэйдотой учраа таарсан байна. Хэрвээ Тамаваши Б.Мөнх-Оргил учраа бөхөө давах юм бол шууд Хацү башёд түрүүлнэ.

Манай бусад бөхчүүдээс Ичиножёо А.Ичинноров, Чиёошома Г.Мөнхсайхан нар зургаан даваа, найман унаатай болж тавин хувийн амжилтаа үзүүлэх боломжгүй боллоо. Япон озэки цолтнуудаас Кайсэй 10 даваа авсан бол Такаясү, Гоэйдо нар найман даваа авч тавин хувийн амжилтаа үзүүлэв.

Токио хотод болж буй энэ оны анхны башё өнөөдөр өндөрлөх бөгөөд түрүү бөхийн төлөө сэкивакэ Тамаваши Б.Мөнх-Оргил болон Такакэйшо нар өрсөлдөж байна.