Монгол, Аргентины Гадаад хэргийн яамд хоорондын зөвлөлдөх уулзалт нэгдүгээр сарын 14-ний өдөр Буэнос Айрес хотноо болов.

Уулзалтыг Монгол Улсын талаас ГХЯ-ны Төрийн нарийн бичгийн дарга Д.Даваасүрэн, Аргентины талаас Гадаад хэргийн дэд сайд Даниель Раймонди нар тэргүүлэв.

Талууд Монгол, Аргентины найрсаг харилцаа, хамтын ажиллагааг өргөжүүлэн хөгжүүлэхийн чухлыг тэмдэглэж, юуны өмнө хөдөө аж ахуй, боловсрол, соёл, спортын салбарт хамтран ажиллахаар тохиролцов. Тухайлбал, өвлийн улиралд малыг шим тэжээлээр тогтвортой хангах,  шүлхийн тархалтыг  хянах чиглэлээр хоёр төсөл эхлүүлэхээр болов.

Аргентин нь сүүн бүтээгдэхүүн үйлдвэрлэх технологийг  сайжруулах, малын эрүүл ахуйг хангах, дархлаажуулах, олон улсын стандартад нийцсэн үхрийн мах экспортлох зэрэг чиглэлээр арвин туршлагатай бөгөөд малын гоц халдварт өвчнийг бүрэн устгаж чадсан орон юм.  Тус  улс нь энэ чиглэлээр гадаадын орнуудад 200 орчим төслийг амжилттай хэрэгжүүлсэн байна.

Мөн испани хэлний мэргэжилтэн бэлтгэх,  хөдөө аж ахуйн чиглэлээр монгол оюутнуудыг сургахад бэлэн байгаагаа Аргентины тал илэрхийлэв.

Спортын салбарт хөлбөмбөг, жүдо зэрэг төрлөөр дасгалжуулагч солилцох, хамтран ажиллах нөөц бололцоо байгааг талууд санал нэгтэйгээр тэмдэглэж, холбогдох байгууллагуудын хооронд шууд харилцаа тогтоохоор болов.

Мөн аялал жуулчлалыг хөгжүүлэх, соёлын солилцоог нэмэгдүүлэхийн төлөө ажиллахаар болов. Хоёр улсын иргэд 2017 оноос эхлэн харилцан визгүй зорчдог болсон нь энэ төрлийн хамтын ажиллагааг урагшлуулахад чухал түлхэц болж байгаа билээ. Монгол Улс энэ 2019 оны долдугаар сард Латин Америкийн зарим орноос сэтгүүлчид урьж, улс оронтойгоо танилцуулахаар төлөвлөж байгааг мэдээлж, Аргентины талыг  хоёроос гурван сэтгүүлч илгээж оролцуулахыг хүсэв.

Хоёр тал НҮБ болон Зүүн Ази, Латин Америкийн хамтын ажиллагааны форум (ФЕАЛАК) зэрэг олон улс, бүс нутгийн бусад байгууллагын хүрээн дэх хамтын ажиллагаагаа өргөжүүлэн бэхжүүлэхийн төлөө байгаагаа харилцан нотлов.

Уулзалтын үеэр Төрийн нарийн бичгийн дарга Д.Даваасүрэн, Дэд сайд Даниель Раймонди нар “Техникийн хамтын ажиллагааны тухай Монгол Улсын Засгийн газар, Бүгд Найрамдах Аргентин Улсын Засгийн газар хоорондын хэлэлцээ”-нд гарын үсэг зурлаа.

Эх сурвалж: ГАДААД ХЭРГИЙН ЯАМ