-Башёгийн сүүлийн өдөр буюу маргааш ёкозүна Хакүхо, Харүмафүжи нар барилдана-

Осака хотноо болж буй мэргэжлийн сүмогийн Харү башёгийн 14 дэх өдөр ёкозүна Хакүхо озэки Кисэносатог давсан бол ёкозүна Харүмафүжи озэки Котошёогикүд уналаа.

Харин ёкозүна Хакүхогийн араас хоёр унаатай нэхэж яваа сэкивакэ Тэрүнофүжи Г.Ган-Эрдэнэ Ичиножёо А.Ичинноровыг давсан байна. Хоёр бөхийн барилдаан 3 минут 40 секунд үргэлжилж, үлэмжт биет Ичиножёо шинэхэн сэкивакэ Тэрүнофүжид ялагдлаа. Тэрүнофүжи башёгийн 13 дахь өдөр (III.20) ёкозүна Хакүхог давсан юм.

Башёг ёкозүна Хакүхо 13 даваа нэг унаатай тэргүүлсэн хэвээр байгаа бол сэкивакэ Тэрүнофүжи Г.Ган-Эрдэнэ 12 даваа, хоёр унаатай удаалж байна.  

Башёгийн сүүлийн өдөр буюу маргаашийн оноолт:

• Ёкозүна Хакүхо(13-1) – ёкозүна Харүмафүжи (10-4)
• Озэки Кисэносато (8-6) – озэки Котошёогикү (8-6)
• Сэкивакэ Тэрүнофүжи (12-2) – озэки Гоэйдо (8-6)
• Комосүби Тамаваши (4-10) – Такэказэ (3-11)
   

Монгол бөхчүүдийн амжилт: (14 өдрийн дараах байдлаар)

Макүүчи:

• Ёкозүна Хакүхо М.Даваажаргал 13-1
• Ёкозүна Харүмафүжи Д.Бямбадорж 10-4
• Сэкивакэ Тэрүнофүжи Г.Ган-Эрдэнэ 12-2
• Комосүби Тамаваши Б.Мөнх-Оргил 4-10
• М-1 Ичиножёо А.Ичиннноров 8-6
• М-8 Токитэнкү А.Хүчитбаатар 3-11
• М-10 Кёкүшүхо Т.Эрдэнэбаатар 7-7
• М-11 Кёкүнтэнхо Н.Цэвэгням 6-8
• М-14 Араваши Э.Дөлгөөн 7-7

Жюүрёо:

• Зүүний -1 Кагамио Б.Нанжид 3-11
• Зүүний -4 Сэйро А.Өнөболд 7-7
• Барууны -5 Асасэкирюүр Б.Дашням 7-7
• Барууны -6 Таканоива А.Баасандорж 10-4
• Барууны -9 Шёотэнро Д.Нямсүрэн 7-7

Ч.БОЛОР