АНУ-ын Конгрессын хороо “British Petroleum” компанийг АНУ-ын далайн орчинд долоон жилийн дотор өрөмдлөг хийхийг хориглосон хууль батлахыг дэмжсэн байна. Байгалийн баялгийн асуудал хариуцдаг Конгрессын хороо аюулгүй байдалын хувьд сөрөг түүхтэй компаниудад далайн орчинд хайгуул хийхийг хориглохыг мөн дэмжжээ. Уг хуульд “British Petroleum” гэж яг нэр цохож заагаагүй ч сүүлийн долоон жилийн дотор 10-аас дээш ажилтан нь нас барсан тул тус компанид хамаарах нь тодорхой юм.

Дөрөвдүгээр сард “Deepwater Horizon” цамхаг дэлбэрэхэд 11 ажилчин нь нас барсан юм. Уг хуулийн төслөөр ажилчдын үхэл өрөмдлөг, үйлдвэрлэл, боловсруулах байранд болсон бөгөөд АНУ-ын эрүүл мэнд, байгаль орчны хуулийг зөрчсөн бол хамаарах юм байна. АНУ “Deepwater Horizon” цамхгийн ослыг одоо хүртэл мөрдөн шалгаж байгаа бөгөөд эцсийн хариу гараагүй байна. “British Petroleum” компани 2005 онд Техаст болсон өөр нэг осолд мөн буруутайгаа хүлээн зөвшөөрсөн бөгөөд тэр ослоос болж, 15 хүн амиа алджээ. Хууль болж батлагдахын тулд уг төсөл Конгрессын хоёр танхимын хоёулангийнх нь дэмжлэгийг авах ёстой.

Т.Бадрах