2019 оны цаг агаарын төлөв

Хуучирсан мэдээ: 2019.01.02-нд нийтлэгдсэн

2019 оны цаг агаарын төлөв

2019 оны цаг агаарын төлөв

Нэгдүгээр сар бол идэр ес дундаа орсон, хүйтний оргил үе байдаг. Энэ сард өмнөх жилүүдээс илүү хүйтэн байх төлөвтэйг цаг уурчид сануулж буй юм. Тодруулбал, агаарын температурын дундаж нь нутгийн хойд хэсгээр 26-31 градус, Говь-Алтай, Баянхонгорын өмнөд хэсгээр 12-17 градус, бусад нутгаар 19-24 градус хүйтэн буюу Увс, Завханы хойд хэсгээр уур амьсгалын дунджаас 0.5-1.0 градусаар илүү хүйтэн байх аж.

Сарын эхний арав хоногт хүйтний эрч суларч, нар наашлах бол хоёр, гуравдугаар арав хоногийн дундуур буюу энэ сарын 20-ноос  эрс хүйтрэх юм.  Увс нуурын хотгор, Идэр, Тэсийн хөндий, Орхон Сэлэнгийн сав, Хэнтийн уулархаг нутгаар шөнөдөө 36-41 градус хүрч, өдөртөө 29-34 градусын хүйтэн байна. Харин Алтайн өвөр говь болон  говийн бүс нутгийн өмнөд хэсэгт шөнөдөө 23-28 градус байх бол  өдөртөө 14-17 градус байх юм. Бусад нутгаар шөнөдөө 28-33 градус, өдөртөө 12-17 градус хүрэх төлөвтэй байна. Мөн нийслэл Улаанбаатар хотод шөнөдөө 36-41 градус хүрч, өдөртөө   19-20 градусын хүйтэн байна. Сарын дундуур зарим газраар цас орж, цасан болон шороон шуурга шуурна. Салхи 12-14 м/cекунд хүрч ширүүснэ.  Хур тундасны хувьд олон жилийн дунджаар Их нууруудын хотгор, говийн бүс нутгаар 0.3-1.5 мм-ийн зузаан ордог. Бусад нутгаар 1.5-3.4 мм-ийн хур тунадас ордог. Ирэх сард Баян-Өлгийн баруун хэсэг, Хөвсгөлийн баруун хэсэг, Ховдын өмнөд тал, Баянхонгор, Өвөрхангайн хойд тал, Сэлэнгийн эх нутгаар уг дунджаас ахиу орно.Тэгвэл агаарын температур II-IV сард ямар байх талаарх урьдчилсан төлөвийг хүргэж байна.

Хоёрдугаар сард

Уур амьсгалын дунджаар сарын дундаж агаарын температур Увс, Завханы ихэнх нутаг, Хөвсгөлийн баруун, Баянхонгорын хойд, Сэлэнгийн зүүн хэсгээр 21-28 градус, Баян-Өлгийн хойд, Ховд, Говь-Алтай, Баянхонгор, Архангайн өмнөд хэсэг, Өвөрхангай, Дундговь, Өмнөговь, Дорноговийн ихэнх нутгаар 6-13 градус, бусад нутгаар 14-20 градус хүйтэн байдаг. Энэ оны хоёрдугаар сард уур амьсгалын дунджаас 0.5-1.0 градусаар дулаан, бусад нутгаар дунджийн орчим байх төлөвтэй байна. Хур тунадасны хувьд Баян-Өлгий, Ховд, Говь-Алтай, Завхан, Хөвсгөл, Архангай, Булган, Дорнодын ихэнх нутаг, Увс, Сүхбаатарын зүүн, Баянхонгорын өмнөд, Өвөрхангайн хойд хэсгээр уур амьсгалын дунджаас ахиу, Говь-Сүмбэр, Дорноговийн ихэнх нутаг, Дундговь, Өмнөговь, Төв аймгийн зүүн, Хэнтийн өмнөд, Сүхбаатарын баруун өмнөд хэсгээр уур амьсгалын дунджаас бага, бусад нутгаар дунджийн орчим хур тунадас орох төлөвтэй байна.

Гуравдугаар сард

Агаарын температур Увс, Завханы хойд болон зүүн, Хөвсгөлийн баруун, Баянхонгорын хойд хэсгээр 11-17 градус хүйтэн, бусад нутгаар  5-10 градус хүрдэг. Энэ сард агаарын дундаж температур олон жилийн дунджаас 0.5-1.5 градусаар дулаан байх төлөвтэй байна. Энэ сард Баян-Өлгий, Архангай, Төв аймгийн хойд, Увсын баруун, Хөвсгөл, Дорнодын зүүн, Өмнөговийн зүүн өмнөд, Дорноговийн өмнөд хэсэг, Булган, Сэлэнгийн ихэнх нутгаар уур амьсгалын дунджаас ахиу, Говь-Алтай, Дундговийн ихэнх нутаг, Ховд, Баянхонгор, Өвөрхангайн өмнөд, Өмнөговийн хойд хэсгээр уур амьсгалын дунджаас бага, бусад нутгаар дунджийн орчим хур тунадас орно.

Дөрөвдүгээр сард

Агаарын температурын дундаж Баян-Өлгийн өмнөд, Увсын хойд, Завханы хойд болон зүүн, Хөвсгөл, Архангай, Говь-Алтайн баруун, Баянхонгорын баруун хойд хэсгээр 3 градус хүйтнээс 1.5 градус дулаан байдаг. Говийн нутгаар 7-11 градус, бусад нутгаа 2-6 градус дулаан байдаг. Энэ сард уур амьсгалын дундаж орчим, бусад нутгаар 0.5-1.5 градусаар дулаан байх төлөвтэй байна.

Энэ мэдээнд өгөх таны сэтгэгдэл?
2
ЗөвЗөв
2
ГайхмаарГайхмаар
2
БурууБуруу
1
ХахаХаха
1
ХөөрхөнХөөрхөн
0
ХарамсалтайХарамсалтай
0
ТэнэглэлТэнэглэл
Баярлалаа!

Холбоотой мэдээ

NewsMN Гар утасны хувилбар Татах
NEWS.mn

Мэдээллийн эх сурвалж