Жижиг дунд үйлдвэрийг хөгжүүлэх сангаас өөрөө болон хамаарал бүхий компаниудаараа зээл авсан УИХ-ын нэр бүхий гишүүдийн бүрэн эрхийг түдгэлзүүлэх саналаа АТГ-аас прокурорын байгууллагад хүргүүлсэн гэх мэдээлэл тархаад байгаа. Тэдгээр гишүүдийн нэг нь Орхон аймгаас УИХ-д сонгогдсон Д.Дамба-Очир.  Энэ талаар АТГ-аас өчигдөр /2018.12.25/ мэдээлэл өгөхдөө “УИХ-ын нэр бүхий гишүүд ирж, гэрчээр мэдүүлэг өгч байгаа. Хамаарал бүхий компаниуд нь зээл авсан учраас нөлөөлсөн эсэх талаар мэдүүлгээ өгөөд явж байгаа. Нэлээд олон гишүүн мэдүүлэг өгсөн. Маш олон аж ахуйн нэгжийг хамарсан байгаа учраас АТГ бүх мөрдөн байцаагчаа дайчлаад дээр нь цагдаагийн байгууллагаас албан хаагч оролцуулаад ажиллаж байна. Манайхаас гурван гишүүний бүрэн эрхийг түдгэлзүүлэх шаардлагатай гэсэн үндэслэлээ гаргасан. Прокурорын байгууллага хэрхэн шийдвэрлэж буй талаар одоогоор мэдээлэл байхгүй” гэсэн юм.

АТГ-аас Д.Дамба-Очирыг “Сапфир стоун”  компанитай холбон шалгаж байна. Тус компани нь ЖДҮХС-аас 1.2 тэрбум төгрөгийн зээл авчээ. Тодруулбал, ЖДҮХС-гаас 2018 оны зургадугаар сарын 8-ны өдөр 1.2 тэрбум төгрөг тус компанийн дансанд шилжин орсон байна.  “Сапфир стоун”  нь  2016 оны гуравдугаар сарын 24-ний өдөр байгуулагджээ. Нийт нэг сая төгрөгийн дүрмийн сантайгаар, гадаад худалдааны чиглэлээр үйл ажиллагаа явуулна гэж улсын бүртгэлд бүртгүүлсэн байна. Энэ тухайд Д.Дамба-Очир гишүүний өмнө хэлсэн ба өнөөдөр өгч байгаа хариултыг VS булангаараа хүргэе.