Хойд Америкийн ҮХЛ-н стэнлийн цомын хошой аварга Холливудын хотын Лос-Анжелес Кингс баг сүүлийн 3 тоглолтондоо хожил аваад байна. Хүчирхэг бүрэлдэхүүнтэй ч энэ улиралд маш хангалтгүй тоглолтыг үзүүлж лигийн 31 багаас 31 оноотой Өрнөд бүсийн сүүлд бичигдэж байгаа. Улирал эхэлснээс хойш дасгалжуулагчаа ажлаас нь чөлөөлж У.Дежарден хэмээх 61 настай Канад эрхмийг багийн дасгалжуулагчаараа томилоод байсан. Канад эрхэм Лос-Анжелес Кингс багийг удирдаж төдийлөн нөхцөл байдлыг өөрчилж чадахгүй байсан бол хамгийн сүүлд Виннипег Жетс, Сан-Хосе Шаркс болон Вегас Голден Найтс багуудыг буулгаж аваад байна.

Лос-Анжелес Кингс баг энэ оныг дуусахаас өмнө Аризона, Вегас болон Колорадо багуудтай тоглоно. Ямартаа ч А.Копитар, Д.Даути, Д.Браун, Ж.Картер, А.Аяфалло, Ж.Маззин, Й.Куик болон И.Ковальчук нарын шилдгүүдээс бүрдсэн Лос-Анжелес Кингс баг 3 тоглолт дараалан хожиж багт итгэл найдварыг бий болгоод байна. Ийм хүчирхэг бүрэлдэхүүнтэй Лос-Анжелес Кингс багийг плэй-оффын гадна үлдээнэ гэвэл тун харамсалтай байх нь дамжиггүй.

Б.БЯМБАБАЯР