Тайландын нийслэл Банког хотод болж буй “Miss Universe” тэмцээнд АНУ-ыг төлөөлөн оролцож байгаа 24 настай Сара Рөүз Саммерс инстаграм хуудсандаа оруулсан бичлэг дээр өрсөлдөгч орны миссүүдийн англи хэлний чадварыг гоочилж, доог тохуу хийсэн нь цахим сүлжээ хэрэглэгчдийн дургүйцлийг ихэд хүргэжээ.

Тодруулбал, Саммерс Австрали болон  Колумбын миссүүдтэй хамт байсан бөгөөд энэ үеэр Азийн улсын төлөөлөл болох Камбож, Вьетнамын миссүүдийн англи хэлний чадварыг шүүмжилж “Вьетнамын миссийн талаар та нар юу гэж бодож байна вэ? Түүний англи хэл мэддэг мэт дүр эсгэж байгаа нь үнэхээр инээдтэй. Түүнтэй ярилцах үедээ зүгээр л толгой дохиод инээгээд байх хэрэгтэй. Би заримдаа яах учраа олдоггүй. Харин Камбожийн мисс англи хэлээр огт ярьж чаддаггүй. Тэрний хэлийг ч мэддэг хүн энд байхгүй. Төсөөлж байна уу? Хөөрхий Камбож” хэмээн доог тохуу хийсэн янзтай ярьсан байна.

Маш олон хүмүүс түүний энэхүү бүдүүдэг үйлдлийг шүүмжилж, олон улсын чанартай томоохон тэмцээн уралдаанд оролцож буй хүн бусад орны соёл уламжлалыг хүндэтгэж биеэ зөв авч явах ёстой, дэлхийн бүх хүн нэг хэлээр ярьдаг байх албагүй гэх мэтээр сэтгэгдлээ илэрхийлсэн байсан бол зарим нэг америкчууд ийм хүнээр улсаа төлөөлүүлж байгаадаа ичиж байгаагаа бичсэн байна.

Тэгвэл 2018 оны АНУ-ын мисс өөрийн зүй бус үйлдэлдээ харамсаж байгаагаа илэрхийлэн инстаграм хуудсаараа дамжуулан уучлалт гуйжээ.

Тэрбээр “Miss Universe тэмцээн бол орон орны бүсгүйчүүд харилцан бие биеийнхээ соёл уламжлал, амьдралын онцлог, үзэл бодол зэргээс суралцах боломж гэдгийг ойлгож байна. Бусад оролцогчидтой хүндэтгэлгүй харьцсандаа уучлал гуйж байна. Миний амьдрал, нөхөрлөл, ажил үйлс гээд намайг хүрээлж буй зүйлс намайг энэрэнгүй, бусдыг ойлгодог эмэгтэй байхг сургалаа.  Би дахиж хэзээ ч бусдыг гомдоох зүйл хийхгүй” хэмээн хэлсэн байна.

Эх сурвалж: CNN