Манай улс олборлосон газрын тосоо дотооддоо боловсруулж бензин шатахууныхаа хэрэгцээний тодорхой хувийг өөрсдөө үйлдвэрлэдэг болох зорилттой ажиллаж байгаа. Энэ зорилгоор Дорноговь аймгийн Алтанширээ сумын нутагт газрын тос боловсруулах үйлдвэр барих ажлыг эхлүүлээд байгаа юм. Монгол улсын томоохон бүтээн байгуулалтад тооцогдож байгаа энэхүү газрын тос  боловсруулах үйлдвэрийн төмөр замын дэд бүтцийг барих ажлын ерөнхий гүйцэтгэгчээр УБТЗ сонгогдож, уг замыг хугацаанаас нь өмнө хүлээлгэн өгөхөөр шамдан ажиллаж байна. Сайншандаас  газрын тосны үйлдвэр хүртэлх 27 км энэ төмөр замын далангийн ажлыг үндэсний хэд хэдэн компани гүйцэтгэж байгаа бөгөөд далан, гүүр, хоолойн ажлын гүйцэтгэл одоогоор 94 хувьтай байна. УБТЗ-ын Зам засварын машинт станц, Замын 4-р ангийн замчид энэ сарын 5-ны өдрөөс төмөр зам тавих ажлаа эхлүүлж 1,5 км төмөр зам тавьжээ. Уг замыг олон улсын стандартад бүрэн нийцсэн Р-65 зам төмөр, төмөр бетон дэр, англи улсын пандрол бэхэлгээтэй барьж байгаа юм. Далан, гүүр хоолой, төмөр зам тавих ажлаас гадна холбоо, дохиоллын систем, өртөө зөрлөг барьж байгуулах томоохон ажлыг ч УБТЗ иж бүрнээр нь хийж гүйцэтгэнэ. УБТЗ-ын инженер техникийн ажилтнууд, замчид төмөр зам барьж байгуулах мэдлэг,  туршлагатай хамт олон гэдгээ харуулж байна. Төмөр зам тавих ажлын гүйцэтгэлд хяналт тавьж байгаа албаныхны үзэж байгаагаар манай мэргэжлийн байгууллагууд гадныхнаас дутахааргүй чанартай сайн гүйцэтгэж байгааг үнэлж байна. Энэ нь УБТЗ-ын инженер техникийн ажилтнууд, мэргэжилтэй ажилчдын мэдлэг, чадвар, хүч бололцоог шинэ төмөр замын зарим нэг төслүүд дээр ашиглах боломж байгааг харуулж байгаа юм.

Эх сурвалж: “УБТЗ” ХНН