Хятад улс ирэх жил дахин ашиглах боломжтой, 10 жилийн дотор дээд тал нь 15 удаа засаж сэлбэн, шинэчилж болохуйц хиймэл дагуул хөөргөх болсныг тус улсын Сансар судлал, шинжлэх ухаан, технологийн корпорациас мэдээллээ. Шинэ үеийн, нэн дэвшилтэт технологи гэгдэж буй дахин ашиглагдах хиймэл дагуул нь 3500 кг жинтэй бөгөөд одоогийн хиймэл дагуулууд шиг нэмэлт цэнэглэгчгүй, харин нарны эрчим хүч хураагууртай байх гэнэ. Мөн задгай сансраас буцааж авчирсных нь дараа дахин ашиглаж болохуйц нийт 500-600 кг нэмэлт ачаа, тоног төхөөрөмж давхар тээх боломжтой аж. Шинэ хиймэл дагуулыг ирэх дөрөвдүгээр сард Жючуань дахь хиймэл дагуул хөөргөх цэгээс 2D пуужингийн хамт хөөргөж, тавдугаар сард буцаан авчрах гэнэ.

Хятад улс өдгөө дахин ашиглагдах хиймэл дагуулын технологийн салбарт дэлхийд гуравт бичигдэж байна. Өнгөрсөн 40 жилийн хугацаанд тус улс гурван үеийн нийт зургаан загварын хиймэл дагуул бүтээжээ.