Монгол Улсад анх удаа классик Пауэрлифтингийн Ази тивийн аварга шалгаруулах тэмцээн болж байна. “Holiday Inn” зочид буудалд болж буй тэмцээнд 18 орны 400 гаруй тамирчид таталт, шахалт, суулт гэсэн гурван төрлөөр эрэгтэй, эмэгтэй тус бүр найман жинд аваргуудаа тодруулна. Энэхүү тэмцээнд манай улсаас 78 тамирчин өрсөлдөж байгаа бөгөөд тэмцээн ирэх бямба гаригт өндөрлөнө.

Манай улсад Пауэрлифтингийн олон улсын тэмцээн хоёр дахь удаагаа зохиогдож байгаа нь энэ юм. Өнгөрөгч аравдугаар сард Пауэрлифтингийн мастеруудын Дэлхийн аварга шалгаруулах тэмцээн болсон билээ.