-АН Их хурлаараа ардчиллын үйл хэрэг шинэ шатанд гарсныг зарлалаа-

Ардчилсан намын IX их хурал өнөөдөр /2018.12.05/Төрийн ордонд болж, 1040 төлөөлөгч оролцож байна. Энэ удаагийн их хуралд АН-ын Ардчилсан залуучуудын холбооны ерөнхийлөгч С.Эрдэнэболд АН-ын дүрмийн үзэл баримтлалын төслийг танилцуулсан бол намын дарга С.Эрдэнэ улс төрийн илтгэл тавьсан юм.  Өчигдөр хуралдсан тус намын Үндэсний бодлогын хорооны хуралдаанаар АН зургаан дэд даргатай байхаар тогтож, УИХ-ын гишүүн З.Нарантуяа, Р.Амаржаргал болон Б.Пүрэвдорж нарыг намын дэд даргаараа сонгосон бол дараагийн гурван дэд даргыг дараагийн Үндэсний бодлогын хорооны хуралдаанаар тодруулахаар тогтсон юм.

Ардчилсан намын дарга С.Эрдэнэ илтгэлдээ “2016 оны сонгуулийн үр дүнгээс хойш Ардчилсан намын шинэчлэл эрчимтэй өрнөж, та бид гардан хэрэгжүүлж, хамтран зүтгэсээр ирлээ. Шинэчлэл бол тодорхой хугацаанд хийгээд дуусгадаг зүйл биш ээ. Шинэчлэл бол нэг сонгуулиар, нэг ялалтаар нэг мөр шийдэгддэг зүйл ч биш юм. Шинэчлэл бол байнгын үйл явц, байнгын зүтгэл, байнгын хамтын ажиллагаа, байнгын хөдөлмөр бөгөөд урт хугацаанд, тогтвортой хэрэгжүүлэх, үндэсний эрх ашиг, тусгаар тогтнолыг хамгаалсан хүний эрх, эрх чөлөөний бүхий л үнэт зүйлсийг баталгаажуулах амьд үйл явц юм. Шинэчлэл өөрөө тодорхой зарчим, үзэл санааны шалгуураар байнга өрнөж байдаг, улс төрийн намыг амьд байлгадаг цусны эргэлт, оршин тогтнох үнэ цэнэ юм. Ардчилсан нам өнгөрсөн хоёр жилийн хугацаанд өрнөсөн шиг ийм далайцтай шинэчлэлийн эрс алхмуудыг өмнө нь хийж байсангүй. 2016 онд Ардчилсан нам УИХ-ын болон бүх шатны сонгуульд амжилтгүй оролцсон хэдий ч өнөөдөр сөрөг хүчнийхээ үүргийг зөвхөн УИХ төдийгүй аймаг, дүүргийн ИТХ-ийн хурлууд дээр маш амжилттай хэрэгжүүлж байна. Бид 2020 оноос эхлэн улс орны хэмжээнд цараатай ялалт, бодлогын манлайллыг хэрэгжүүлж эхэлнэ” гэдгийг илтгэлдээ онцолсон юм.

С:ЭРДЭНЭБОЛД: АРДЧИЛСАН НАМ УЛС ТӨРД ШИНЭ СОЁЛ, ХАНДЛАГЫГ ТОГТООЖ БАЙНА

-Ардчилсан намын үзэл баримтлалыг шинэчлэн баталлаа. Одоо хэрэгжиж буй үзэл баримтлалын 50 хувь шинэчлэгдсэн. АН нийгэмд манлайлал үзүүлэхдээ ямар зарчмаар ажиллах юм, үнэт зүйлсийн юуг нь хамгийн чухалд тооцох юм бэ гэдгээ тодорхойлж байна гэсэн үг. Баруун төвийн намын гол шалгууруудыг үзэл баримтлалдаа тунхаглаж байна. Намуудын үзэл баримтлалд эрх чөлөө, тусгаар тогтнол гэх мэт идэвхгүй үг ихээр багтдаг. Харин одоо үүнийг өөрчлөх цаг нь болсон. Нийгмийн хурдтай харилцааг дагаад илүү боловсронгуй болгох шаардлага бий болсон. Ардчилсан нам энэ шалгуурт нийцүүлж үзэл баримтлалаа шинэчилж байна. Үзэл баримтлалын төсөлд үнэт зүйл, эрх чөлөөгөө яаж хангаж, хамгаалах талаар нарийн зохицуулалтыг оруулж өгч байна. Хувь хүн, эдийн засаг, улс төр, хуулийн засаглал, үндэсний эв нэгдэл тусгаар тогтнолыг дэмжсэн эрх чөлөөний асуудлыг тусгаж өгсөн. Өнөөдөр үзэл баримтлалаа шинэчлэн баталж буй нь Ардчилсан нам цаашид сонгуульд өрсөлдөхдөө зөвхөн энэ үзэл баримтлалын хүрээнд зарчмын дагуу ажиллана гэсэн үг юм. Өмнө нь улс төрийн намууд иргэдэд таалагдахын тулд мөнгө амладаг байсан. Зарим үед зүүний намууд нь барууны, барууны намууд нь зүүний заримдаа бүгдээрээ төвийн нам болчихсон байдаг байсан. Намууд дарга нарынхаа нэрээс өөрөөр ялгарах үйл ажиллагаа явуулдаггүй байсан. Харин одоо Ардчилсан нам улс төрд шинэ соёл, хандлагыг тогтоож байна. Бид баруун төвийн нам гэдгээ тодорхойлж өөрсдийн ажиллах хүрээгээ тогтоож өгч байна гэсэн үг. Энэ бол Ардчилсан намын Үндсэн хууль.

З.НАРАНТУЯА: АН-ЫН ШИНЭЧЛЭЛ АМЖИЛТТАЙ ҮРГЭЛЖИЛЖ БАЙНА

-АН-ын үнэт зүйл, үзэл баримтлал юу байх вэ гэдэг асуудлыг бид хэлэлцэж байна. Өнгөрсөн 30 орчим жил АН-ын үзэл баримтлал ямар байсан, дараагийн шинэ хөгжлийн шатандаа ямар байх вэ гэдгээ тодорхойлох баримт бичгийн төслийг сүүлийн хоёр жил гаруйн хугацаанд боловсруулаад бүх гишүүдээсээ саналыг нь аваад эцэслэн батлаад хурал үргэлжилж байна. Мөн дүрэмдээ зарим өөрчлөлт оруулна. Өнгөрсөн хоёр жилийн хугацаанд АН-ын шинэчлэл амжилттай хэрэгжиж байгаа. Дүрмээ шинэчлээд байсан. Хоёр жилийн хугацаанд эргээд дүрмээ засах, янзлах олон зүйл байгаа нь харагдсан. Намын гишүүдийн зүгээс 3000 гаруй санал ирсэн. Ер нь АН өөрийнхөө бодлогыг маш тодорхой болгож байгаа. АН баруун төвийн үзэл баримтлалтай нам байна гэдгээ тодорхойлсон. Үндсэн таван түлхүүр бодлого баримтална. Түлхүүр бодлогоо хэрэгжүүлэхийн тулд ямар суурь зарчмуудтай байх. Суурь зарчмуудаа хэрэгжүүлэхийн тулд ямар бодлогуудтай байх тухай маш нарийвчилж тодорхой зааж өгч байгаа.

Ш.ЧИМЭГ